अर्थ – आजच्या डिजिटल विश्वात कृत्रिम बुद्धिमत्ता म्हणजे AI बद्दलचा लोकांमध्ये उत्साह इतका वाढला आहे की लोक त्यामागील जोखमींकडे दुर्लक्ष करत आहेत. एआयचा सध्याचा चमक आणि ग्लॅमर दिसतो तितका मजबूत नसून हा बुडबुडा फुटेल तेव्हा २००० च्या नॉर्टेल-सिस्को संकटापेक्षाही मोठा असू शकतो, असे प्रसिद्ध गुंतवणूकदार मायकेल बरी म्हणतात.
मायकल बरी यांना कदाचितच कोणी ओळखत नसेल. मायकेल जेम्स बरी एक अमेरिकन गुंतवणूकदार आणि हेज फंड मॅनेजर आहेत ज्यांनी २००८ च्या आर्थिक संकटापूर्वी अमेरिकन गृहनिर्माण बाजारात डाव खेळून प्रचंड पैसा कमावला. डॉक्टरची शिक्षण घेतलेल्या बरी यांना खोल विश्लेषणात्मक कौशल्ये आणि अद्वितीय मानसिकतेचे श्रेय दिले जाते. सायन कॅपिटलद्वारे त्यांनी त्यांच्या गुंतवणूकदारांसाठी अब्जावधी डॉलर्स कमावले तर, आता त्यांनी एआय बबलचा इशारा दिला आहे.
एआयचा बबल फुटणार
मायकल बरी म्हणाले की, एनव्हीडिया आणि पॅलांटीर सारख्या कंपन्यांमधील प्रचंड गुंतवणूक हा एक धोकादायक बुडबुडा बनला आहे, जो फुटला तर २००० च्या नॉर्टेल आणि सिस्को क्रॅशपेक्षाही गंभीर असू शकतो.
बाजारात किती मोठी घसरण होणार समजत नाही
बाजारातील दिग्गज इन्व्हेस्टर म्हणून खयाती असलेले मायकल बरी यांनी लेखक मायकल लुईस यांच्याशी झालेल्या संभाषणात म्हटले आहे की, कृत्रिम बुद्धिमत्तेभोवतीचा सध्याचा प्रचार हा साधा उत्साह नाही तर वाढता धोका आहे. बरी म्हणाले, ‘बाजार एआय बबलचा आकार आणि मंदी किती खोल असेल याचा कमी लेखत आहे.’ बरी म्हणतात की 2000 मध्ये नॉर्टेल आणि सिस्कोप्रमाणेच, पॅलांटीर आणि एनव्हीडिया या वाढीच्या केंद्रस्थानी आहेत, परंतु यावेळी परिस्थिती आणखी नाजूक आहे.
अपेक्षा आणि जाहिरातींवर आधारित खर्च
बरी म्हणतात की आजकाल कंपन्या एआयमध्ये गुंतवणुकीची घोषणा करून शेअर्सच्या किमती वाढवू शकतात. विनोदाने बरी म्हणतात की, ‘तुम्ही एआयवर एक डॉलर भांडवली खर्च केल्याचा उल्लेख केला तर तुमचे मार्केट कॅप तीन डॉलर्सने वाढते.’ म्हणजे त्यांच्या किमती प्रत्यक्ष कामगिरीपेक्षा अपेक्षा आणि प्रचारावर आधारित आहेत.
एनव्हीडिया आणि पॅलांटीर
दोन्ही ‘जगातील सर्वात भाग्यवान कंपन्यांपैकी एक आहेत, असे बरी पुढे म्हणतात.’ एनव्हीडियाला प्रथम क्रिप्टो मायनिंगच्या वाढीचा फायदा झाला आणि आता जनरेटिव्ह एआयच्या लाटेचा फायदा झाला. या दरम्यान, पॅलांटीरने चॅटजीपीटी लाँच झाल्यानंतर एआय सोल्यूशन्स म्हणून त्यांच्या अनेक जुन्या सेवांचे मार्केटिंग करण्यास सुरुवात केली आणि अनेक कंपन्यांनी आधुनिक दिसण्यासाठी वाढत्या महागड्या एआय सेवा खरेदी करण्यास सुरुवात केली.
लोकांना फसवून कमवला जातोय नफा
कंपन्या ग्राफिक्स प्रोसेसिंग युनिट्स (GPUs) आणि सर्व्हर्सचे आयुष्यमान वाढवून त्यांचा नफा वाढवत आहेत, जेव्हा प्रत्यक्षात ही मशीन्स खूप लवकर कालबाह्य होतात असेही बरी यांनी निर्दशनात आणून दिले. या प्रकारच्या अकाउंटिंगमुळे खरी किंमत लपवली जाते आणि या सर्व कारणांमुळे जेव्हा AI चा हा बबल ब्लास्ट होईल तेव्हा नॉर्टेल-सिस्को क्रॅशपेक्षाही जास्त नुकसान करेल.
बरी यांनीपॅलांटीर आणि एनव्हीडियावर खूप दूरच्या किमतीत दोन वर्षांचे पुट ऑप्शन्स घेतल्याची पुष्टी केली. अहवालांमध्ये हे $१ अब्ज करार म्हणून वर्णन केले आहे, पण प्रत्यक्ष गुंतवणूक कमी होती आणि जास्त आकडा काल्पनिक मूल्यामुळे होता हेही स्पष्ट केले. पण अजूनही बरी यांचा आत्मविश्वास स्पष्ट आहे की ‘पुढील दोन वर्षे पुरेशी आहेत.’
