बीड : राष्ट्रवादी काँग्रेस (शरदचंद्र पवार) पक्षाच्या नेत्या सुप्रिया सुळे आणि पवार कुटुंबावर अत्यंत कडक शब्दांत टीका केली आहे. धनंजय मुंडे यांना लक्ष्य करणे आणि ओबीसी नेतृत्व संपवणे हा सुप्रिया सुळे यांचा मुख्य अजेंडा असल्याचा खळबळजनक आरोप बीड येथे ‘माध्यमांशी’ शी बोलताना ओबीसी नेते नवनाथ आबा वाघमारे यांनी केला.
वाघमारे म्हणाले की, धनंजय मुंडे हे एक आक्रमक आणि अभ्यासू ओबीसी नेते आहेत. त्यांना जाणीवपूर्वक मंत्रीपद मिळू नये आणि त्यांचे राजकीय करिअर उद्ध्वस्त व्हावे, यासाठी सुप्रिया सुळे यांनीच त्यांच्याविरुद्ध मीडिया ट्रायल चालवली होती. सुळे यांना मुंडेंचा राजीनामा तर हवाच होता, पण त्यांना जेलमध्ये पाठवण्याचेही त्यांचे मनसुबे होते, असा दावा वाघमारे यांनी केला.
पवार कुटुंबावर भ्रष्टाचाराचे आणि जातीवादाचे आरोप
सुप्रिया सुळे यांच्यावर निशाणा साधताना वाघमारे यांनी काही जुन्या प्रकरणांचा उल्लेख केला. ते म्हणाले, सुप्रिया सुळे यांच्या भावाने ७०,००० कोटींचा घोटाळा केला, तेव्हा त्या गप्प का होत्या? त्यांनी स्वतःच्या भावाविरुद्ध आंदोलन का केले नाही? पार्थ पवार यांनी महार वतनाची जमीन घेण्याचा प्रयत्न केला, तरीही सुळे त्यांना क्लीन चिट देतात. छगन भुजबळ यांना जेलमध्ये पाठवण्यामागे शरद पवार आणि सुप्रिया सुळे यांचेच षडयंत्र होते. वाघमारे यांनी थेट आरोप केला की, सुप्रिया सुळे आणि पवार कुटुंब हे जातीवादी आहे. त्यांना दलित, मुस्लिम, ओबीसी आणि आदिवासी समाज चालत नाही.
निवडणुका आणि ओबीसी शक्ती
वाघमारे यांनी आगामी राजकीय गणितांवर भाष्य करताना सांगितले की आमदारांची संख्या २०२४ च्या विधानसभा निवडणुकीत ओबीसींचे ३९ आमदार वाढले आहेत, तर मराठा समाजाचे १८ आमदार कमी झाले आहेत. येणाऱ्या काळात आम्ही ओबीसींचे १०० आमदार वाढवू आणि मराठ्यांचे १०० आमदार कमी करू तसेच रोहित पवार आणि मनोज जरांगे यांच्यासोबत जाणाऱ्यांना ओबीसी समाज त्यांची योग्य जागा दाखवून देईल, असे म्हणाले. सुप्रिया सुळे यांचा पक्ष आता संपलेला आहे. ओबीसी समाजाने आता त्यांना त्यांची जागा दाखवण्याचे ठरवले असून येणाऱ्या काळात त्यांचा पक्ष पूर्णपणे निस्तनाभूत होईल. असे ओबीसी नेते नवनाथ वाघमारे यांनी म्हटले आहे.
