सोलापूर : सोलापूर जिल्ह्यातील मोहोळ तालुक्यात भाजपला जबरदस्त धक्का बसला आहे. मोहोळ नगरपरिषदेतील नगराध्यक्ष पदाच्या निवडणुकीत उपमुख्यमंत्री एकनाथ शिंदे यांच्या नेतृत्वातील शिवसेना पक्षाने निर्णायक विजय मिळवत भाजपला जोरदार धक्का दिला आहे. शिवसेना उमेदवार सिद्धी वस्त्रे यांनी भाजप उमेदवार शीतल क्षीरसागर यांचा १७० मतांनी पराभव करत नगराध्यक्ष पदावर आपले नाव कोरले आहे. भाजपचे माजी आमदार राजन पाटील यांच्यासाठी हा मोठा धक्का मानला जात आहे.
याआधी, अनगर नगराध्यक्षपदाच्या निवडणुकीवेळी उपमुख्यमंत्री अजित पवार यांना थेट आव्हान देणारे राजन पाटील यांचे सुपुत्र बाळराजे पाटील चर्चेत आले होते. मात्र चहूबाजूंनी टीका झाल्यानंतर राजन पाटलांनी अजित दादांची माफी मागितली होती.
एकनाथ शिंदेंचं वर्चस्व
मोहोळमध्ये झालेल्या निवडणुकीत मोहोळ नगरपरिषदेच्या २० पैकी ९ जागा एकनाथ शिंदे यांच्या शिवसेनेने जिंकत मुसंडी मारली आहे. मोहोळ तालुक्यात शिंदे गटाचे वर्चस्व स्पष्ट झाले आहे. या निकालामुळे भाजपच्या गोटात अस्वस्थता निर्माण झाली आहे.
एकनाथ शिंदेंनी जाहीर सभा घेत इशारा दिला होता
निवडणुकीपूर्वी प्रचार सुरू असताना उपमुख्यमंत्री एकनाथ शिंदे यांनी मोहोळमध्ये जाहीर सभा घेतली होती. या सभेत एकनाथ शिंदेंनी भाजपचे माजी आमदार राजन पाटील यांना थेट इशारा देत “मोहोळ तालुक्यात दादागिरी खपवून घेतली जाणार नाही” असे ठणकावून सांगितले होते. त्यांच्या या इशाऱ्यानंतर राजकीय वातावरण चांगलेच तापले होते.
भाजपला धक्का
निवडणूक निकालानंतर शिंदे गटाच्या कार्यकर्त्यांनी जल्लोष केला असून, हा विजय आगामी राजकीय समीकरणांच्या दृष्टीने अत्यंत महत्त्वाचा मानला जात आहे. मोहोळ तालुक्यात शिवसेना शिंदे गटाने भाजपला दिलेला हा धक्का सोलापूर जिल्ह्याच्या राजकारणात नवी दिशा देणारा ठरण्याची शक्यता आहे.
दुसरीकडे, सोलापुरातील अक्कलकोट नगरपरिषदेवर नगराध्यक्षपदाच्या निवडणुकीत भाजपचे मिलन कल्याणशेट्टी तिसऱ्या फेरी अखेर ७ हजार ६७२ मतांनी आघाडीवर आहेत. तर बार्शी नगरपरिषदेत नगराध्यक्ष पदाच्या भाजप उमेदवार तेजस्विनी कथले ५५०० मतांनी आघाडीवर आहेत.
