सोलापूर : महानगरपालिका निवडणुकीच्या रणधुमाळीत सोलापुरात रक्ताचा सडा पडला आहे. उमेदवारी अर्ज मागे घेण्याच्या शेवटच्या दिवशी राजकीय वादाचे रूपांतर रक्तरंजित संघर्षात झाले असून, मनसेच्या एका तरुण पदाधिकाऱ्याची धारदार शस्त्राने भोकसून हत्या करण्यात आली आहे. बाळासाहेब सरवदे (रा. जोशी गल्ली, जुना बोरामणी नाका) असे मृत तरुणाचे नाव आहे. या घटनेनंतर सोलापुरात प्रचंड तणाव निर्माण झाला असून संतप्त जमावाने भाजप कार्यालयावर हल्ला चढवत तोडफोड केली आहे.
नेमकं काय घडलं?
मिळालेल्या माहितीनुसार, मृत बाळासाहेब सरवदे यांच्या घरातील महिला सोलापूर महानगरपालिका निवडणुकीसाठी इच्छुक उमेदवार होत्या. मात्र, ऐनवेळी पक्षाने त्यांचा पत्ता कट करून विरोधकांना उमेदवारी जाहीर केली. याच उमेदवारीच्या कारणावरून गेल्या दोन दिवसांपासून जोशी गल्ली परिसरात दोन गटांत खटके उडत होते. शुक्रवारी उमेदवारी अर्ज मागे घेण्याच्या मुदतीवरून राजकीय वातावरण चांगलेच तापले होते. याच वादाचे रूपांतर हाणामारीत झाले आणि बाळासाहेब यांच्यावर धारदार शस्त्राने हल्ला करण्यात आला. गंभीर जखमी अवस्थेत त्यांना खासगी रुग्णालयात दाखल करण्यात आले, मात्र उपचारादरम्यान त्यांचा मृत्यू झाला.
भाजप नेत्यांवर गंभीर आरोप
बाळासाहेब सरवदे हे महाराष्ट्र नवनिर्माण विद्यार्थी सेनेचे पदाधिकारी होते, अशी माहिती मनसे नेते प्रशांत इंगळे यांनी दिली आहे. या घटनेनंतर प्रशांत इंगळे यांनी माध्यमांशी बोलताना भाजप नेत्यांवर गंभीर आरोप केले आहेत. या हत्येमागे राजकीय कट असल्याचा संशय त्यांनी व्यक्त केला आहे. दरम्यान, या घटनेचा निषेध करण्यासाठी जमावाने जोशी गल्लीतील भाजप कार्यालयाची तोडफोड केली, ज्यामुळे परिसरात भीतीचे वातावरण पसरले आहे.
पोलिस छावणीचे स्वरूप
हत्येच्या घटनेनंतर सोलापूर पोलिसांनी शहरात मोठा बंदोबस्त तैनात केला आहे. जुना बोरामणी नाका आणि जोशी गल्ली परिसराला पोलिस छावणीचे स्वरूप आले आहे. निवडणुकीच्या तोंडावर झालेल्या या राजकीय हत्येमुळे सोलापूर महापालिकेचा आखाडा आता रक्ताने माखला असून, प्रशासनासमोर कायदा व सुव्यवस्था राखण्याचे मोठे आव्हान उभे राहिले आहे. मनसे नेते प्रशांत इंगळे यांनी भाजप नेत्यांवर गंभीर आरोप केले आहे. राज ठाकरेंनी यामध्ये लक्ष घालावे आणि भाजप नेत्यावर गुन्हा दाखल करावा अशी मागणी मनसे नेते प्रशांत इंगळे यांनी केली आहे. पोलिसांकडून अद्याप कोणताही गुन्हा दाखल झाला नाही, पोलीस आयुक्त एम राजकुमार, उपायुक्त विजय कबाडे , इतर वरिष्ठ सर्व पोलीस अधिकारी घटनास्थळी जाऊन पाहणी केली आहे. पंचनामा झाल्यानंतर रात्री उशिरापर्यंत गुन्हा दाखल करण्याची प्रक्रिया सुरू होती.
