चीन – चीनमध्ये माकडांची मागणी अचानक वाढली आहे. एका माकडासाठी तब्बल २५ लाख रुपयांचा धाव मिळत आहे. चीनमध्ये एकाएकी माकडांची टंचाई निर्माण झाली आहे.
चीनमध्ये माकडांना वाढती मागणी
चीनमध्ये नव्या वर्षात माकडांची मागणी वाढली आहे. काही हजारांमध्ये राजधानी बीजिंगच्या आसपास विकल्या जाणाऱ्या माकडांचा दर आता थेट २५-२५ लाख रुपयांवर पोहोचला आहे. विशेष म्हणजे जिनपिंग सरकारच्या संस्था, यंत्रणादेखील माकडांची चढ्या दरानं खरेदी करत आहेत.
माकडांच्या प्रजननासाठी प्रयत्न सुरु
माकडांची संख्या वाढवण्यासाठी, त्यांचं प्रजनन वाढवण्यासाठी मदत करा, असं आवाहन सरकारकडून करण्यात आलं आहे. चीनमध्ये माकडांच्या पालनपोषणासाठी नैसर्गिक मार्गांसोबतच बायोकेमिकलचाही वापर केला जात आहे. बायोकेमिकलचा वापर करुनही प्रजनन वाढवलं जात आहे.
माकडांची मागणी अचानक वाढली
चीनच्या एनएचपी प्रजनन आणि विकास संस्थेनं दिलेल्या माहितीनुसार याची सुरुवात २०१८ मध्येच झाली होती. २०२१ मध्ये चीननं सर्वाधिक ३० हजार माकडांचं प्रजनन केलं होतं. सध्याच्या घडीला चीनमध्ये माकडांना प्रचंड मागणी आहे.
पाच वर्षांनी माकडांच्या मागणीत वाढ
फायनान्शियल टाईम्सच्या वृत्तानुसार, चीनमध्ये सध्या एक माकड २५-२५ लाख रुपयांना विकलं जात आहे. २०२१ मध्येही चीनमध्ये माकडांचे दर इतकेच होते. त्यावेळी करोना लसीवर काम सुरु होतं. यानंतर माकडांची मागणी घटली. पण आता ५ वर्षांनी पुन्हा एकदा माकडांना मोठी मागणी आहे.
माकडांच्या खरेदीसाठी स्पर्धा
चीनमध्ये असलेल्या प्रयोगशाळा माकडांची खरेदी करत आहेत. यात मोठी स्पर्धा आहे. माकडं खरेदी करण्यावरुन मारामारी, धावाधाव सुरु आहे. काही औषध कंपन्या बाहेरूनही माकडं खरेदी करत आहेत.
तस्करी पुन्हा सुरु होणार?
परिस्थिती बिघडल्यास चीनमध्ये माकडांची तस्करी वाढू शकते. २०२१ मध्ये तशी वेळ आली होती. चीनमध्ये माकडांची टंचाई निर्माण झाली होती. तेव्हा कंबोडियातून माकडांची तस्करी केली जात होती. कारण माकडांची मागणी प्रचंड होती.
वैद्यकीय क्षेत्रात नवनवे प्रयोग
चिनी सरकारनं वैद्यकीय क्षेत्रात जगाला मागे टाकण्यासाठी नवे नवे प्रयोग करण्याचं आवाहन केलं आहे. त्यामुळे चीनमधून अनेक औषध कंपन्या औषधं आणि लसींच्या चाचण्या घेत आहेत. २०२५ मध्ये एमपॉक्स, करोना, कॅन्सर लसींच्या चाचण्या झाल्या आहेत.
माकडांची गरज नेमकी कुठे भासते?
मानवाचं आयुर्मान वाढवण्यासाठीही चीन लस तयार करत आहे. त्या लसीच्या चाचण्याही घेतल्या जात आहेत. या चाचण्या माकडांवर घेतल्या जातात. त्यामुळे माकडांची गरज लागते. चाचण्यांची संख्या वाढत आहे. त्या तुलनेत माकडांची संख्या कमी पडू लागली आहे.
माकडांचे दर का वाढले?
माकडांची संख्या कमी असल्यानं त्यांच्या किमती वाढल्या आहेत. चीनमध्य दरवर्षी साधारणत: २५ हजार माकडांवर लसींच्या चाचण्या घेतल्या जातात. यंदा चाचण्यांच्या संख्या वाढल्या आहेत. त्यामुळे माकडांचे दर वाढले आहेत.
