मुंबई – पुण्यातील मुंढवा जमीन खरेदी घोटाळा प्रकरणात आर्थिक गुन्हे शाखेने अखेर आरोपपत्र दाखल केले आहे. धक्कादायक म्हणजे, या आरोपपत्रात फक्त शीतल तेजवानी यांचे नाव आहे. राजकीय आणि सामाजिक वर्तुळात ज्यांच्या नावाने खळबळ माजली होती त्या पार्थ पवार आणि दिग्विजय पाटील यांची नावे आरोपपत्रातून वगळण्यात आली आहेत.
मुंढवा परिसरातील एका जमिनीच्या व्यवहारावरून गेल्या काही काळापासून मोठा वाद निर्माण झाला होता. या जमीन घोटाळ्यात कोट्यवधी रुपयांची अफरातफर आणि फसवणूक झाल्याचा आरोप करण्यात आला होता. सुरुवातीच्या तक्रारींमध्ये आणि प्राथमिक तपासादरम्यान पार्थ पवार यांच्या नावाचा उल्लेख आल्याने राजकीय वर्तुळात मोठी खळबळ उडाली होती. मात्र, पोलिसांनी केलेल्या सखोल तपासानंतर या व्यवहारात पार्थ पवार यांचा थेट सहभाग नसल्याचे समोर आले आहे.
शीतल तेजवानी यांच्यावर ठपका तपास पथकाने न्यायालयात सादर केलेल्या कागदपत्रांनुसार, या गुन्ह्यात शीतल तेजवानी यांचा मुख्य सहभाग असल्याचे निष्पन्न झाले आहे. जमिनीच्या हस्तांतरणात आणि आर्थिक व्यवहारात अनियमितता केल्याचा ठपका ठेवत पोलिसांनी केवळ तेजवानी यांच्यावरच आरोप निश्चित केले आहेत. यामुळे या प्रकरणातून पवार कुटुंबीयांना दिलासा मिळाला आहे.
चार्जशीट समोर आल्यानंतर हा प्रश्न विचारला जात आहे कि हे प्रकरणही राजकीय धुलाईच्या यंत्रात दडपले गेले आहे का? विरोधी गट आणि सामाजिक कार्यकर्ते याला सत्ताधारी पक्षाच्या संरक्षणाशी जोडत आहेत. विशेष म्हणजे सामाजिक कार्यकर्त्या अंजली दमानिया यांनी या प्रकरणाची सखोल चौकशी करण्याची मागणी फक्त एक दिवस आधी केली होती आणि दुसऱ्याच दिवशी आरोपपत्र दाखल करण्यात आले.
यावर अंजली दमानिया यांनी सोशल मीडियावर तीव्र प्रतिक्रिया व्यक्त केल्या आहेत. त्यांनी प्रश्न उपस्थित केला आहे की महाराष्ट्र राजकीय दलालीचे केंद्र बनले आहे का? कायदा फक्त सामान्य लोकांसाठी आहे का? न्याय हा शब्द राजकारण्यांसाठीच संपला आहे का? दमानिया यांनी आठवण करून दिली की शीतल तेजवानी यांनी दिग्विजय पाटील यांच्याविरुद्ध दिवाणी खटला दाखल केला आहे, ज्यामध्ये त्यांनी थकबाकी न भरल्याचा आरोप आहे, तर दिग्विजय पाटील यांनी शीतल तेजवानी यांच्याविरुद्ध फसवणुकीचा आरोप करत स्वतंत्र दिवाणी खटला दाखल केला आहे.
