‘बिग बॉस मराठी’च्या पाचव्या पर्वात आपल्या खेळीने प्रेक्षकांची मने जिंकणारा आणि या पर्वाचा विजेता ठरलेला सूरज चव्हाण याने नोव्हेंबर २०२५ मध्ये विवाहबंधनात अडकून आपल्या नव्या आयुष्याची सुरुवात केली. सूरजच्या लग्नाला त्याची ‘बिग बॉस’मधील सहस्पर्धक आणि जवळची मैत्रीण जान्हवी किल्लेकर हिने खास उपस्थिती लावली होती. या लग्नातील प्रचंड गर्दी आणि गोंधळामुळे लग्नाला उशीर होत असल्याचे पाहून जान्हवीचा संयम सुटला आणि ती चांगलीच संतापली होती, ज्याचा व्हिडीओ सोशल मीडियावर प्रचंड व्हायरल झाला होता. आता या संपूर्ण प्रकारावर आणि लग्नातील अनुभवावर जान्हवीने मौन सोडत सविस्तर माहिती दिली आहे.
एका मुलाखतीत बोलताना जान्हवीने सूरजच्या लग्नातील आठवणींना उजाळा दिला. ती म्हणाली की, “सूरजच्या लग्नात खूप धमाल आली. आपण महाराष्ट्रात राहत असलो तरी प्रत्येक भागातील पद्धती वेगळ्या आहेत आणि मला तिथल्या पद्धती खूप आवडल्या. लग्नासाठी सूरजने तब्बल ५० बॉडीगार्ड्स तैनात केले होते, पण उपस्थितांची गर्दी इतकी अफाट होती की त्यातील ४-५ बॉडीगार्ड्स चक्क बेशुद्ध होऊन पडले. सूरजने लग्नाची पत्रिका इन्स्टाग्रामवर शेअर केली होती, त्यामुळे त्याच्या चाहत्यांना लग्नाचे ठिकाण समजले आणि तिथे तुफान गर्दी झाली. लग्नाच्या वेळी स्टेजवर आणि स्टेजच्या खाली लोकांची इतकी गर्दी होती की पाय ठेवायलाही जागा नव्हती.”
जान्हवीने पुढे सांगितले की, “लग्नाचा मुहूर्त सायंकाळी ५:३० चा होता, पण ८ वाजले तरी लग्न विधी सुरू झाले नव्हते. मला त्याच रात्री ९ वाजता दुसऱ्या एका कार्यक्रमाला जायचे होते. अखेर माझा संयम सुटला आणि मी तिथे उपस्थित लोकांना आणि आयोजकांना खडसावले. त्यानंतर अवघ्या ५ मिनिटांत लग्नाचे विधी सुरू झाले.”
सूरजच्या साध्या आणि भोळ्या स्वभावाचे कौतुक करताना जान्हवी म्हणाली, “सूरज खूपच साधा आहे. त्याला वाटले होते की ‘बिग बॉस’मधील त्याचे सर्व मित्र लग्नाला येतील. तो शेवटपर्यंत सर्वांची वाट पाहत होता आणि मला म्हणत होता की ‘हा येणार आहे, तो येणार आहे’. पण प्रत्येकाच्या काही अडचणींमुळे त्यांना जमले नसेल. त्यावेळी तो थोडा नाराज झाला होता आणि म्हणाला, ‘जान्हवी, कोणी नाही आले तरी तू आलीस’. मी माझ्या कामाचे सर्व कार्यक्रम रद्द करून फक्त त्याच्यासाठी तिथे गेले होते, कारण मला माहित होते की त्याला माझी गरज आहे.
