छत्रपती संभाजीनगर : जिल्हा परिषद निवडणुकीच्या मतदान प्रक्रियेदरम्यान नियमांचे उल्लंघन केल्याचा एक खळबळजनक प्रकार समोर आला असून, याचे गंभीर पडसाद उमटले आहेत. पैठण विधानसभा मतदारसंघाचे आमदार विलास भुमरे यांच्या अल्पवयीन मुलाला मतदान केंद्रात प्रवेश देऊन त्याच्या बोटाला शाई लावल्याप्रकरणी प्रशासनाने कठोर पावले उचलली आहेत. या प्रकरणात कर्तव्यात कसूर केल्याचा ठपका ठेवत जिल्हाधिकाऱ्यांनी पाचोड येथील मतदान केंद्रावरील तीन कर्मचाऱ्यांना तत्काळ निलंबित केले आहे.
मिळालेल्या सविस्तर माहितीनुसार, शनिवारी ७ फेब्रुवारी रोजी जिल्हा परिषदेसाठी मतदान पार पडले. यावेळी आमदार विलास भुमरे हे पाचोड येथील मतदान केंद्रावर आपला हक्क बजावण्यासाठी गेले होते. मात्र, मतदान केंद्रात जाताना त्यांनी आपल्या अल्पवयीन मुलालाही सोबत नेले होते. केवळ मुलाला सोबत नेलेच नाही, तर मतदान प्रक्रियेतील नियमांना हरताळ फासत निवडणूक कर्मचाऱ्यांनी त्या मुलाच्या बोटालाही मतदानाची अधिकृत शाई लावली. हा संपूर्ण प्रकार कॅमेऱ्यात कैद झाला आणि त्याचे फोटो तसेच व्हिडिओ सोशल मीडियावर मोठ्या प्रमाणात व्हायरल झाले.
निवडणूक प्रक्रियेच्या नियमांनुसार, मतदान केंद्रात कोणाही अनधिकृत व्यक्तीला किंवा अल्पवयीन मुलाला प्रवेश निषिद्ध असतो. तसेच मतदानाची शाई केवळ कायदेशीर मतदारालाच लावता येते. या घटनेमुळे निवडणूक प्रक्रियेच्या गोपनीयतेवर आणि पारदर्शकतेवर प्रश्नचिन्ह उपस्थित करण्यात आले होते. सोशल मीडियावर या प्रकरणाची तीव्र चर्चा सुरू झाल्यानंतर जिल्हा प्रशासनाने याची अत्यंत गांभीर्याने दखल घेतली.
जिल्हाधिकारी तथा निवडणूक निर्णय अधिकारी दिलीप स्वामी यांनी या प्रकरणाची सखोल चौकशी करण्याचे आदेश दिले होते. प्राथमिक चौकशीअंती निवडणूक कामात हलगर्जीपणा केल्याचे सिद्ध झाल्याने तीन कर्मचाऱ्यांवर निलंबनाची कारवाई करण्यात आली आहे. यामध्ये केंद्र प्रमुख दिलीप नरवडे, ज्यांच्या देखरेखीखाली हा सर्व प्रकार घडला, त्यांच्यावर कारवाई झाली आहे. तसेच आमदाराच्या मुलाला शाई लावणाऱ्या मतदान अधिकारी संगीता केदार आणि केंद्रावरील सुरक्षेची जबाबदारी असलेल्या होमगार्ड रेणूका बोंबले यांनाही निलंबित करण्यात आले आहे.
या घटनेमुळे संपूर्ण जिल्ह्यात एकच खळबळ उडाली आहे. लोकप्रतिनिधींच्या उपस्थितीत अशा प्रकारे नियमांचे उल्लंघन होणे आणि कर्मचाऱ्यांनी त्यावर कोणतीही हरकत न घेता सहकार्य करणे, ही बाब लोकशाहीच्या दृष्टीने गंभीर मानली जात आहे. या कारवाईमुळे निवडणूक कर्तव्यावर असलेल्या इतर कर्मचाऱ्यांमध्येही कडक संदेश गेला असून, भविष्यात अशा चुका टाळण्यासाठी प्रशासन सतर्क झाले आहे.
