मुंबई : ठाकरे गटाचे नेते संजय राऊत यांनी केलेल्या दाव्यावर आता चंद्रकांत पाटील यांनी त्यांच्यावर टीका केली आहे. तसेच राऊत ठाकरे गटात फूट पाडणार आहेत, असाही दावा त्यांनी केला आहे.
चंद्रकांत पाटील यांनी संजय राऊत यांच्यावर टीका केली
ठाकरे गटाचे नेते तथा खासदार संजय राऊत यांनी केलेल्या विधानाची राज्यभरात चर्चा होते. त्यांनी आता जळगाव जिल्ह्यातील मुक्ताईनगर विधानसभा मतदारसंघाचे आमदार चंद्रकांत पाटील यांच्याविषयी मोठे विधान केले आहे. चंद्रकांत पाटील पुढच्या विधानसभा निवडणुकीत उपमुख्यमंत्री एकनाथ शिंदे यांची साथ सोडून भाजपाच्या तिकिटावर निवडणूक लढवतील, असा दावा संजय राऊत यांनी केला आहे. असे असतानाच आता चंद्रकांत पाटील यांनी राज्याच्या राजकारणात खळबळ उडवून देणारा दावा केला आहे. आता संजय राऊत हे भविष्यात ठाकरे गट फोडणार आहेत, असे खळबळजनक भाष्य चंद्रकांत पाटलांनी केलं आहे.
संजय राऊतांवर सडकून टीका
शिवसेना पक्षाचे जे तुकडे झाले आहेत, ते संजय राऊत यांच्यामुळेच झाले आहेत. एकसंघ शिवसेनेचे तुकडे करण्यास संजय राऊत हेच कारणीभूत आहेत. संजय राऊत मिठाचा खडा टाकण्याचा प्रयत्न करत आहेत. संजय राऊत हा जळगाव मध्ये लग्नाला येतात आणि राजकीय गप्पा मारतात. आम्ही शिवसेनेत किती निष्ठावंत आहोत हे तुम्हाला सांगण्याची गरज नाही, असा हल्लाबोल चंद्रकांत पाटील यांनी केला.
संजय राऊत ठाकरे गट फोडण्याच्या तयारीत
एकनाथ शिंदे यांना सोडण्याचा कोणताही विचार मी करू शकत नाही, असं स्पष्टीकरणही त्यांनी दिलं आहे. जेव्हा आम्ही असं कुठलंही काम करू तेव्हा थेट घरी बसू. संजय राऊत शिवसेनेचा ठाकरे गट फोडून एक नवा गट स्थापन करून उरलेली शिवसेना फोडण्याच्या तयारीत आहेत. ठाकरे गटात राऊत हे मोठी उठाव करणार आहेत. ते नवीन गट स्थापन करण्याच्या तयारीत आहेत, असाही खळबळजनक दावा चंद्रकांत पाटील यांनी केला.
दरम्यान, चंद्रकांत पाटील यांनी केलेल्या दाव्यानंतर राजकीय वर्तुळात मोठी खळबळ उडाली आहे. पाटील यांनी राऊतांना डिवचण्यासाठी तर अशा प्रकारचा दावा केला नाही ना? असाही प्रश्न उपस्थित केला जातोय.
संजय राऊत काय म्हणाले होते?
संजय राऊतांनी आज मुक्ताईनगरचे आमदार चंद्रकांत पाटील आणि पाचोरा पारोळाचे आमदार पुढची निवडणूक भाजपाकडून लढतील, असा दावा केलाय. हे दोन्ही आमदार गिरीश महाजन यांच्या अतिशय निकटवर्तीय असल्याचेमानले जातात त्यामुळे ही माझी खात्रीची माहिती आहे, अशीही पुष्टी संजय राऊतांनी जोडली होती.
