नागपूर : मुख्यमंत्री देवेंद्र फडणवीस यांनी माजी मुख्यमंत्री उद्धव ठाकरेंना टोला लगावला. पण त्यामुळे भाजपच्या आमदार चित्रा वाघ यांच्यावर एक्स पोस्ट डिलीट करण्याची वेळ आली. फडणवीस यांनी पत्रकार परिषदेत इंडिगो संकटावरुन शिवसेना उबाठाचे प्रमुख उद्धव ठाकरेंना लक्ष्य केलं. फडणवीस यांनी ठाकरेंना चिमटा काढला. पण त्यामुळे त्यांच्याच पक्षाच्या आमदार चित्रा वाघ यांची कोंडी झाली. वाघ यांनी एक्सवर फोटोंसह केलेली पोस्ट डिलीट केली. पण या पोस्टमधील फोटो सोशल मीडियावर व्हायरल झाले आहेत.
गेल्या आठवड्यापासून देशभरात इंडिगो विमान कंपनीच्या ग्राहकांची गोची झाली आहे. इंडिगोच्या शेकडो विमानांच्या फेऱ्या रद्द झाल्या आहेत. त्यामुळे हजारो प्रवासी विमानतळावर अडकले आहेत. इंडिगोच्या कारभाराचा फटका हजारो प्रवाशांना बसला आहे. त्यावरुन माजी मुख्यमंत्री उद्धव ठाकरेंनी केंद्र सरकारला लक्ष्य केलं. त्यांच्या टिकेला मुख्यमंत्री फडणवीस यांनी उत्तर दिलं.
उद्धवजी इंडिगोच्या विमानानं फिरत नाही एवढी माहिती तर तुम्हाला आहे, असं मुख्यमंत्री फडणवीस पत्रकारांच्या प्रश्नाला उत्तर देताना म्हणाले. ‘उद्धवजी ज्या विमानानं फिरतात, त्या विमानाला कोणतीही अडचण नाही. ते नीट येऊ शकतात. बाकी कोणाला अडचण असेल तर शिंदे साहेबांनी आणि मी समृद्धी महामार्ग बांधलेला आहे. गाडी पाहिजे असेल तर पाठवून देतो. गाडीत बसून ७ ते ८ तासांत नागपुरला पोहोचता येईल’, असा टोला फडणवीस यांनी लगावला.
फडणवीस यांची टोलेबाजी उद्धव ठाकरेंना उद्देशून होती. पण त्यामुळे भाजप आमदार चित्रा वाघ यांची गोची झाली. चित्रा वाघ यांनी नागपुरला दाखल झाल्यावर एक्सवर एक पोस्ट केली होती. त्यांनी काही फोटोदेखील शेअर केले होते. ‘महाराष्ट्र विधिमंडळाच्या हिवाळी अधिवेशनासाठी आज आमचा दादा @prasadladofficial च्या चार्टर्ड विमानाने विधान परिषदेतील भाजपचे गटनेते प्रविणभाऊ दरेकर, आमदार सुमितजी वानखेडे आणि नवनाथ बन आम्ही नागपूर विमानतळावर दाखल’, असं वाघ यांनी पोस्टमध्ये नमूद केलं होतं.
मुख्यमंत्री फडणवीस इंडिगोच्या समस्येवरुन उद्धव ठाकरेंना प्रायव्हेट जेटचा संदर्भ धरुन लक्ष्य करत असताना त्यांच्या पक्षाची नेतेमंडळीदेखील प्रायव्हेट जेटनंच प्रवास करत होती. त्यामुळे फडणवीस यांनी ठाकरेंना टोला लगावला तरी त्यामुळे वाघ यांची कोंडी झाली. त्यामुळेच की काय वाघ यांनी ही पोस्ट डिलीट केली.
