मुंबई : महायुती सरकार सत्तेत येऊन वर्ष उलटलं आहे. पण अद्याप राज्याला विरोधी पक्षनेता मिळालेला नाही. विरोधी पक्षातील एकाही पक्षाकडे सदनातील एकूण सदस्य संख्येच्या १० टक्के आमदार नाहीत. त्यामुळे विरोधी पक्षनेतेपद द्यायचं की नाही, याचा निर्णय विधानसभेचे अध्यक्ष राहुल नार्वेकर घेतील. वर्ष उलटून गेलं तरीही त्यांनी याबद्दलचा निर्णय घेतलेला नाही. उद्धव ठाकरेंच्या पक्षाला विरोधी पक्षनेतेपद हवं आहे. त्यासाठी ज्येष्ठ आमदार भास्कर जाधव यांचं नाव सुचवण्यात आलं आहे.
महायुतीला सत्तेत येऊन वर्षभराचा कालावधी पूर्ण झाला आहे. पण अद्याप तरी विधानसभेच्या विरोधी पक्षनेत्याचा प्रश्न कायम आहे. विरोधी पक्षनेतेपद मिळवण्यासाठी विधानसभेत विरोधी पक्षाकडे किमान १० टक्के आमदार लागतात. राज्याच्या विधानसभेत एकूण २८८ आमदार आहेत. त्यामुळे हा आकडा २९ इतका आहे. पण विरोधी बाकांवरील एकाही पक्षाकडे हा आकडा नाही. ठाकरेंची शिवसेना विरोधी बाकावरील सर्वात मोठा पक्ष आहे. पण त्यांच्याकडे २० आमदारांचं बळ आहे.
विरोधी पक्षनेतेपद देण्यासाठी कोणताही नियम नसल्याचं आमदार भास्कर जाधव सांगतात. पण विरोधी पक्षनेतेपद देण्यावरुन महायुतीत मतभिन्नता असल्याची माहिती आहे. मुख्यमंत्री देवेंद्र फडणवीस आणि उपमुख्यमंत्री अजित पवार विरोधी पक्षनेता असायला हवा. ठाकरेंच्या शिवसेनेला हे पद देण्यास हरकत नाही, या मताचे आहेत. पण उपमुख्यमंत्री आणि शिवसेनेचे मुख्य नेते एकनाथ शिंदे यांचं मत वेगळं आहे.
ठाकरेंच्या शिवसेनेकडे संख्याबळ नाही. त्यामुळे त्यांना विरोधी पक्षनेतेपद देण्याची गरज नाही, असं उपमुख्यमंत्री शिंदे यांना वाटतं. संख्याबळ वाढवा आणि विरोधी पक्षनेतेपद मिळवा, असा खोचक सल्ला त्यांनी विरोधी पक्षांना दिला आहे. ठाकरेंच्या शिवसेनेला विरोधी पक्षनेतेपद मिळाल्यास त्यांच्या रडारवर शिंदेसेनाच असेल, अशी एक भीती आहे. विरोधी पक्षनेत्यांनी सत्ताधाऱ्यांची प्रकरणं काढल्यास त्याचा सर्वाधिक फटका शिंदेसेनेला बसू शकतो.
गृहराज्यमंत्री योगेश कदम यांच्या मातोश्रींच्या नावे असलेल्या बारवर पोलिसांची धाड पडली. या बारमध्ये तरुणी अश्लील नृत्य करत होत्या, ही माहिती ठाकरेंच्या पक्षाचे आमदार अनिल परब यांनी विधिमंडळात दिली होती. अधिवेशनाच्या शेवटच्या दिवशी परब यांच्यापर्यंत ही माहिती कोणी पोहोचवली, याची चर्चा शिंदेसेनेत बरेच दिवस सुरु होती. आपल्याला ठरवून टार्गेट केलं जात असल्याची शिंदेसेनेच्या आमदार, मंत्र्यांची भावना आहे. ठाकरेंच्या पक्षाकडे विरोधी पक्षनेतेपद गेल्यास ठाकरेंच्या पक्षाकडून होणारे हल्ले आणखी तीव्र होऊ शकतात.
शिंदेंना हवा ‘मोदी पॅटर्न’
काँग्रेसची धूळधाण उडवत भाजपनं नरेंद्र मोदींच्या नेतृत्त्वात २०१४ मध्ये सत्तांतर घडवलं. काँग्रेसला २०१४ मध्ये ४४ जागा मिळाल्या. तर २०१९ मध्ये काँग्रेसला ५२ जागांवर समाधान मानावं लागलं. लोकसभेत विरोधी पक्षनेतेपद मिळवण्यासाठी ५५ खासदार लागतात. मोदी सरकारच्या पहिल्या दोन टर्ममध्ये काँग्रेसला विरोधी पक्षनेतेपद देण्यात आलं नव्हतं. शिंदे याच पॅटर्नसाठी आग्रही आहेत.
