बारामती – काँग्रेसचे नेते आणि लोकसभेतील विरोधी पक्षनेते राहुल गांधी यांच्या सतत निशाण्यावर असलेले उद्योगपती गौतम अदानी पुन्हा एकदा बारामतीच्या दौऱ्यावर आले आहेत. त्यांच्या बारामती दौऱ्यावेळी ज्येष्ठ नेते शरद पवार, उपमुख्यमंत्री अजित पवार, खासदार सुप्रिया सुळे, सुनेत्रा पवार, आमदार रोहित पवार, युवा नेते युगेंद्र पवार त्यांच्या स्वागतासाठी एकत्र होते. शरद पवार यांच्या नावाने उभारण्यात आलेल्या एआय सेंटरचे अदानी यांच्या हस्ते उद्घाटन करण्यात आलं. यावेळी अदानी यांनी शरद पवार यांच्यावर स्तुतीसुमने उधळत ते माझे मार्गदर्शक असल्याचा उल्लेख केला.
बारामतीत बोलताना गौतम अदानी म्हणाले, ‘शरद पवारांना सर्व क्षेत्रातील माहिती अधिक आहे. शरद पवार माझ्यासाठी आदरणीय आणि आदर्श आहेत. दीर्घकालीन राजकारणामध्ये शरद पवार यांनी खूप मोठे सामाजिक काम उभारलं आहे,” असं कौतुक गौतम अदानींनी केलं. तसंच शरद पवार माझे मार्गदर्शक असल्याचं मत त्यांनी व्यक्तव्य केलं.
अदानींच्या बारामती दौऱ्यानंतर राजकीय समीकरणंही बदलणार?
महानगरपालिकेच्या निवडणुकीत एकत्र येणार अशी चर्चा असतानाच दोन्ही राष्ट्रवादीची युती फिस्कटली, मात्र बारामतीत सर्व पवार अदानींसाठी व देशातील पहिल्या आर्टीफिशियल इंटेलिजन्सच्या महाविद्यालयाच्या उद्घाटनासाठी एकत्र आले. त्याची चर्चा शैक्षणिक व राजकीय वर्तुळातही झाली. बारामतीत विद्या प्रतिष्ठानच्या वतीने उभारण्यात आलेल्या आर्टिफिशिअल इंटेलिजन्सच्या देशातील पहिल्या अत्याधुनिक महाविद्यालयाचे उद्घाटन उद्योगपती गौतम अदानी यांच्या हस्ते आज झाले. या महाविद्यालयास अदानी समूहाच्या वतीने मदत करण्यात आली आहे. दरम्यान यासंदर्भात यापूर्वीच अदानी यांनी बारामतीत येऊन भेट दिली होती. तेव्हा शेतीतील कृत्रिम बुद्धीमत्तेच्या वापरासंदर्भातील माहिती त्यांनी घेतली होती. त्यानंतर देशातील पहिल्या कृत्रिम बुद्धीमत्तेच्या महाविद्यालयास परवानगी मिळाल्यानंतर अदानी पुन्हा एकदा बारामतीत आले आणि त्यांच्या स्वागतासाठी संपूर्ण पवार कुटुंब एकत्र आलेले पाहायला मिळाले.
गौतम अदानी आणि पवार यांच्यातील स्नेहसंबंध लपून राहत नाहीत. मागील वेळीही अदानी हे पत्नीसह बारामतीत आले होते. आता पुन्हा एकदा त्यांनी बारामतीत येऊन पवारांचे अतिथ्य स्वीकारल्याने चर्चांनी उधाण आंल आहे. महत्त्वाचे म्हणजे अदानींची भेट अशा काळात झाली आहे, जेव्हा राज्यातील राजकारण पुन्हा एकदा वेगळ्या वळणावर आले आहे. लोकसभा आणि विधानसभा निवडणुकीत झालेल्या संघर्षानंतर आता दोन्ही राष्ट्रवादी एकत्र येण्याच्या हालचाली सुरू आहेत. अदानी यांच्या दौऱ्यानंतर याबाबतच्या घडामोडींना अधिक वेग येणार का, हे पाहणं महत्त्वाचं ठरणार आहे.
