चंदीगड – भाजप पंजाबमध्ये ऑपरेशन लोटस चालवत आहे, असा गंभीर आरोप आम आदमी पक्षाच्या (आप) आमदार नरिंदर कौर भारज यांनीकेला आहे. संगरूर येथील आपच्या आमदार नरिंदर कौर भारज यांनी दावा केला कि हरियाणाचे मुख्यमंत्री नायब सिंह सैनी यांनी भाजपच्या ऑपरेशन लोटसचा भाग म्हणून संपर्क साधून पक्षात सामील होण्याची ऑफर दिली आहे. आप आमदार नरिंदर कौर भारज यांनी पत्रकार परिषदेत हे आरोप केलेत.
आम आदमी पक्षाचे प्रवक्ते आणि मीडिया प्रभारी बलतेज पन्नू यांच्यासोबत चंदीगड येथे झालेल्या पत्रकार परिषदेत आमदार भारज यांनी दावा केला की सैनी यांनी अलिकडच्या काळात मध्यस्थांमार्फत त्यांच्याशी संपर्क साधला होता. त्या म्हणाल्या कि पंजाबच्या राजकारणाच्या भविष्यावर चर्चा करण्यासाठी हरियाणाच्या मुख्यमंत्र्यांनी गुप्त बंद दाराआड बैठक करण्याचा प्रस्ताव ठेवला होता. त्यांना २०२७ च्या पंजाब विधानसभा निवडणुकीत त्यांच्या गृह मतदारसंघ संगरूरमधून लढण्यासाठी भाजप तिकिट देण्याचे आश्वासनही देण्यात आले होते.
आप आमदार म्हणाल्या कि त्यांना सांगण्यात आले होते की त्यांच्या सर्व मागण्या पूर्ण केल्या जातील. त्यांनी असेही सांगितले की भाजपने त्यांना सांगरूर मतदारसंघातून भाजप उमेदवार म्हणून उभे करण्याचे आश्वासन दिले आहे. आप आमदार नरिंदर भारज यांनी सांगितले की त्या आपच्या एक निष्ठावंत सैनिक आहेत आणि त्यांना विकत घेतले जाऊ शकत नाही. मात्र आपच्या आमदार नरिंदर कौर भारज यांनी केलेले आरोप हरियाणाचे मुख्यमंत्री नायब सिंह सैनी यांनी फेटाळून लावले आणि ते पूर्णपणे निराधार आणि राजकीय द्वेषाने प्रेरित असल्याचे म्हटले.
पंजाबचे अर्थमंत्री आणि आपचे ज्येष्ठ नेते हरपाल सिंग चीमा यांनी या मुद्द्यावर तीव्र प्रतिक्रिया व्यक्त केली. ते म्हणाले की पंजाबमध्ये भाजपकडे मजबूत पाठिंबा आणि मजबूत नेते नाहीत, त्यामुळे ते हताश होऊन इतर पक्षातील नेत्यांना तोडण्याचा कट रचत आहेत. पुढील वर्षी पंजाब विधानसभेच्या निवडणुका होणार आहेत. ही घटना भाजपला आधीच जागा मिळवण्यासाठी संघर्ष करणाऱ्या राज्यात आपला प्रभाव वाढवण्याचा स्पष्ट प्रयत्न असल्याचे अधोरेखित करते. मात्र आप आमदाराच्या आरोपांमुळे निःसंशयपणे राजकीय पारा तापला आहे.
