मुंबई : बोरिवली येथील एका शाळेमध्ये गणित अध्यापक मंडळाच्या गणित प्रभुत्व परीक्षेत डमी विद्यार्थी बसविण्यात आल्याचा प्रकार उघडकीस आला आहे. बोगस नावाने परीक्षेला बसलेल्या या १४ वर्षांच्या विद्यार्थ्याने प्रश्नपत्रिका मिळताच व्हॉट्सॲपवरून इतरांना पाठविल्या. हा प्रकार लक्षात येताच शाळेने या विद्यार्थ्याला पोलिसांच्या स्वाधीन केले. चौकशीत खासगी शिकवणी घेणाऱ्या शिक्षिकेच्या सांगण्यावरून त्याने हा प्रताप केल्याचे समोर येताच मुलासह शिक्षिकेविरुद्ध बोरिवली पोलिस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, गोराई येथील एका माध्यमिक शाळेमध्ये १४ डिसेंबरला दुपारी १२ ते २ या वेळेत गणित प्रभुत्व परीक्षा घेण्यात आली. या परीक्षेला पाचवी, सातवी आणि आठवीचे १३९ विद्यार्थी उपस्थित होते. परीक्षा वेळेनुसार सुरू होताच परीक्षा केंद्र क्रमांक १३मधील एक विद्यार्थी वारंवार बाथरूमला जात असल्याचे पर्यवेक्षिकेच्या लक्षात आले. विशेष म्हणजे तो जाताना प्रत्येक वेळी प्रश्नपत्रिका घेऊन जात असल्याने संशय आणखी बळावला. पर्यवेक्षिकेने हा प्रकार मुख्याध्यापकांच्या लक्षात आणून दिल्यानंतर या मुलाची तपासणी करण्यात आली. झडतीमध्ये या मुलाकडे मोबाइल आढळला. शाळेच्या कर्मचाऱ्यांनी मोबाइल तपासला असता त्याने प्रश्नपत्रिका व्हॉट्स ॲपवर पाठविल्याचे दिसून आले.
शाळा प्रशासनाने मुलास घेऊन बोरिवली पोलिस ठाणे गाठले. खोटे नाव सांगणाऱ्या या मुलाकडे पोलिसांनी आधारकार्ड मागितले, धारकार्ड मागितले, मात्र त्याने नसल्याचे सांगितले. पालकांचे मोबाइल क्रमांक चुकीचे सांगणाऱ्या या मुलाने पोलिस कारवाईच्या भीतीने खरे क्रमांक दिले. पोलिसांनी त्याच्या आईला पोलिस ठाण्यात बोलावून घेत मुलाचे प्रताप सांगितले. त्यावर नववीत शिकणारा मुलगा शिकवणीसाठी जातो, असे सांगून घराबाहेर पडल्याचे त्याच्या आईने सांगितले.
शाळा प्रशासनाने दिलेल्या तक्रारीनुसार पोलिसांनी मुलासह शिक्षिकेविरुद्ध गुन्हा दाखल केला आहे. शाळेतील परीक्षेतही डमी विद्यार्थी बसविले जात असल्याने आश्चर्य व्यक्त करण्यात येत आहे.
