ठाणे : संपूर्ण राज्याचं लक्ष लागून राहिलेल्या नगरपरिषद आणि नगर पंचायतींचे निकाल आज जाहीर झाले. सकाळी १० वाजल्यापासून मतमोजणीला सुरुवात झाली. या निवडणुकीत अपेक्षेप्रमाणे भाजपनं पहिला क्रमांक पटकावला. महायुतीनं विधानसभा निवडणुकीच्या कामगिरीची पुनरावृत्ती केली. भाजपनं सर्वाधिक ११८, तर शिंदेसेनेनं ५८, अजित पवारांच्या राष्ट्रवादीनं ३७ नगर परिषदांवर सत्ता आणली. महाविकास आघाडीतील काँग्रेसनं ३४ ठिकाणी यश मिळवलं आहे. एकनाथ शिंदे यांनी अनेक ठिकाणी भाजपला आव्हान देत जोरदार लढत दिली. पण त्याचवेळी एकनाथ शिंदे यांच्या बालेकिल्ल्यात भाजपनं कमल फुलवलं. अंबरनाथ आणि बदलापूर नगर परिषदेत भाजपची सत्ता आली आहे. शिंदेंच्या ठाण्यात भाजपनं मोठी मुसंडी मारली आहे.
बदलापूर आणि अंबरनाथ नगर परिषदेतील शिवसेनेचा पराजय हा एकनाथ शिंदे यांचे पुत्र आणि कल्याणचे खासदार श्रीकांत शिंदे यांच्यासाठी मोठा धक्का मानला जात आहे. एकनाथ शिंदे यांनी राज्यभरात प्रचार केला. त्यांनी प्रचारसभांचा अक्षरश: धडाका लावला होता. शिंदे यांनी राज्यभरात ५३ सभा घेतल्या. शिंदे राज्यभरात फिरत असल्यानं अंबरनाथ आणि बदलापूर नगर परिषदांच्या निवडणुकीची जबाबदारी श्रीकांत शिंदे यांच्यावर होती. या दोन्ही नगर परिषदा श्रीकांत शिंदे यांच्या कल्याण लोकसभा मतदारसंघात येतात. दोन्ही ठिकाणी श्रीकांत शिंदे यांनी जातीनं लक्ष घातलं होतं. पण त्यांच्या पदरी निराशा पडली.
अंबरनाथ शिवसेनेचा बालेकिल्ला मानला जातो. गेल्या अडीच दशकांपासून नगर परिषदेवर शिवसेनेची सत्ता होती. हा बालेकिल्ला भेदण्यात भाजपच्या तेजश्री करंजुळे यशस्वी ठरल्या. मतदानाला केवळ ४८ तास शिल्लक राहिललेले असताना अंबरनाथमध्ये गोळीबार झाला. त्यामुळे अंबरनाथमध्ये वाळेकर कुटुंबाची असलेली दहशत हा विषय भाजपनं केंद्रस्थानी घेतला आणि प्रचार केला. भाजप-शिवसेना एकमेकांसमोर उभे ठाकले. शिवसेनेच्या विरोधात मतदारांसमोर भाजप हाच एक सक्षम पर्याय होता.
शिवसेनेचे अंबरनाथ शहरप्रमुख आणि माजी नगराध्यक्ष अरविंद वाळेकर आणि त्यांचा मुलगा निखिल यांचा अतिआत्मविश्वास पक्षाला नडला. सेनेनं नगराध्यक्षपदासाठी वाळेकर कुटुंबाच्या बाहेरचा उमेदवार दिला असता, तर कदाचित नगराध्यक्षपद राखता आलं असतं. शहरातील व्यापारी संघटनेनं अखेरच्या टप्प्यात भाजपला पाठिंबा दिला. प्रचारासाठी मिळालेला अतिरिक्त वेळ भाजपनं मोठ्या खुबीनं वापरला. याच वाढीव वेळेत मुख्यमंत्री देवेंद्र फडणवीस यांची सभा झाली. त्याचा फायदा भाजपला झाला.
दुसरीकडे बदलापूरमध्येही भाजपनं शिवसेनेला दणका दिला. गेल्या अनेक वर्षांपासून बदलापूर नगर परिषदेत शिवसेनेची सत्ता होती. पण शिवसेनेच्या वामन म्हात्रे यांच्या पत्नी वीणा म्हात्रे यांना पराभूत करत भाजपच्या रुचिता घोरपडे विजयी झाल्या. हा शिवसेनेसाठी मोठा धक्का आहे. शिंदेंच्या होमग्राऊंडवर भाजपनं मोठा धमाका केला आहे.
