अहिल्यानगर : महानगरपालिका निवडणुकीच्या तोंडावर अहिल्यानगरमध्ये उद्धव ठाकरे यांना जबर धक्का बसला आहे. दिवंगत माजी आमदार अनिल राठोड यांचे चिरंजीव व युवासेनेचे राज्य सहसचिव विक्रम राठोड यांनी ठाकरेसेनेला रामराम ठोकत उपमुख्यमंत्री एकनाथ शिंदे यांच्या शिवसेनेत प्रवेश करणार असल्याची अधिकृत घोषणा केली आहे. ऐन निवडणुकीत झालेल्या या बंडामुळे शहरातील उद्धवसेनेच्या राजकारणात खळबळ उडाली आहे.
काय म्हणाले विक्रम राठोड?
विक्रम राठोड यांनी ठाकरेसेनेच्या नेतृत्वावर थेट आणि तीव्र टीका केली. आम्ही पक्षाशी एकनिष्ठ राहिलो. वडिलांनी पंचवीस वर्षे निष्ठेने काम केले. शिंदेसेना स्थापन झाली तेव्हा अनेक गेले, पण आम्ही थांबलो. मात्र आज निष्ठेची किंमत उरलेली नाही. कार्यकर्त्यांना न्याय मिळत नाही. जिथे कार्यकर्त्याची किंमत आहे, तो पक्ष म्हणजे शिंदेसेना असा घणाघाती आरोप त्यांनी केला.
ते पुढे म्हणाले, इतर पक्षांतून आलेल्यांना महत्त्व दिले गेले. त्यांना पक्षाची दिशा माहिती नाही. हिंदुत्व, छत्रपती शिवाजी महाराजांचे विचार बाजूला पडत चालले होते. अशा परिस्थितीत थांबणे शक्य नव्हते. शिंदेंबरोबर गेल्याशिवाय कार्यकर्त्यांना आणि स्वतःलाही न्याय देता येणार नाही, असेही राठोड म्हणाले.
महापालिका निवडणूक प्रक्रियेत महानगरप्रमुखाने विश्वासात न घेतल्याने राठोड नाराज होते. पक्षप्रमुखांकडे जबाबदारीची मागणी करूनही दखल न घेतल्याचा आरोप त्यांनी केला. शहरात राठोड कुटुंबाचा केवळ वापर करून घेण्यात आला, अशी बोचरी टीकाही त्यांनी केली. दरम्यान, सोमवारी विक्रम राठोड यांनी पत्नी तेजस्विनी राठोड यांची अपक्ष उमेदवारी जाहीर करत पक्षाला माझी गरज राहिली नाही अशी भावनिक पोस्ट सोशल मीडियावर केली होती. त्यानंतर मंगळवारी त्यांनी उद्धवसेनेतून बाहेर पडण्याची घोषणा केल्याने अंतर्गत वाद चव्हाट्यावर आला आहे.
या घडामोडींमुळे अहिल्यानगरमध्ये उद्धवसेनेत राठोड विरुद्ध काळे असे दोन गट स्पष्टपणे समोर येत असून, ऐन निवडणुकीत झालेल्या या बंडामुळे ठाकरेसेनेची मोठी कोंडी झाल्याचे चित्र आहे.
कोण होते अनिल राठोड?
शिवसेनेचे ज्येष्ठ नेते आणि माजी मंत्री अनिल राठोड यांचे ऑगस्ट २०२० मध्ये निधन झाले. करोनावरील उपचार सुरु असताना हृदयविकाराचा धक्का आल्याने त्यांची प्राणज्योत मालवली. अनिल राठोड यांनी अहमदनगर शहर मतदारसंघात सलग २५ वर्ष लोकप्रतिनिधित्व केले होते. सेनेच्या तिकिटावर १९९० ते २०१४ अशा सलग पाच टर्म ते आमदार म्हणून निवडून आले होते. २००९ मध्ये त्यांच्याकडे शिवसेना उपनेतेपदाची जबाबदारी सोपवली होती. शिवसेना-भाजप महायुती सरकारच्या काळात त्यांच्याकडे महसूल राज्यमंत्रीपदाची जबाबदारी होती.
