धाराशिव – महाराष्ट्र दिनी ध्वजारोहण कार्यक्रमातच मोठा गोंधळ उडाला. भूविकास बँकेच्या महिला कर्मचाऱ्याने अंगावर पेट्रोल ओतून घेतले अन….
आज १ मे रोजी सगळीकडे महाराष्ट्र दिन साजरा करण्यात येत आहे. शासकीय स्तरावर कार्यक्रम सुरू आहेत. पण धाराशिवमध्ये महाराष्ट्र दिनी ध्वजारोहण कार्यक्रमातच मोठा गोंधळ उडाला. येथील भूविकास बँकेच्या महिला कर्मचाऱ्याने टोकाचे पाऊल उचलले. सेवेत कायम करण्यासाठी ही महिला गेल्या काही दिवसांपासून मागणी करत आहे. आज तिने शासकीय कार्यक्रम सुरू असताना अंगावर पेट्रोल ओतले आणि पेटवून घेतले. याप्रकारामुळे कार्यक्रमात एकच खळबळ उडाली.
पेट्रोल ओतून घेतले पेटवून
शासकीय सेवेत पुन्हा सामावून घेण्यासाठी महिला कर्मचार्याने जिल्हा उपनिबंधक कार्यालयासमोर आत्मदहनाचा प्रयत्न केला. अंगावर पेट्रोल ओतून घेत स्वतःला पेटवून घेतले. यामध्ये महिला ७० टक्के भाजल्याची माहिती डॉक्टरांनी दिली. बेबी किसनराव पाटील असे आत्मदहनाचा प्रयत्न करणाऱ्या महिलेचे नाव आहे. यापूर्वी त्या भूविकास बँकेत व्यवस्थापक म्हणून काम करत होत्या. अनुकंपा तत्वावर त्यांना भूविकास बँकेत नोकरी मिळाली होती. इतर कर्मचाऱ्यांनी स्वेच्छानिवृत्ती स्वीकारली. तर पाटील यांना थकीत वेतन आणि इतर प्रलंबित लाभ मिळालेले नाहीत. त्यांना हक्काचे पैसे मिळत नसल्याने आणि सरकार दरबारी दाद मिळत नसल्याने निराशा आली होती. त्यातूनच त्यांनी हे टोकाचे पाऊल टाकल्याचे समजते.
१ मे रोजी ध्वजारोहणचा कार्यक्रम सुरू असतानाच बेबी पाटील यांनी अंगावर ज्वलनशील पदार्थ ओतला आणि पेटवून घेतले. अचानक घडलेल्या या घटनेने एकच खळबळ उडाली. पोलीस आणि अधिकाऱ्यांची तारांबळ उडाली. पोलिसांनी आग विझवण्याचा प्रयत्न केला. तर पाटील यांना उपचारासाठी तात्काळ शासकीय वैद्यकीय महाविद्यालय रुग्णालयात हलवण्यात आले. या घटनेमुळे परिसरात तणावाचे वातावरण आहे.
भूविकास बँका बंद झाल्यानंतर इतर सेवेमध्ये सामावून घेण्यासाठी मागील तीन वर्षापासून महिलेचे प्रयत्न सुरू आहेत. तर आता जिल्हा उपनिबंधक यांच्यावर महिलेच्या नातेवाईकांनी गंभीर आरोप केले आहेत. त्यांनी उपनिबंधकांवर गुन्हा दाखल करण्याची मागणी केली आहे. आत्मदहनामध्ये भाजलेल्या महिलेवर धाराशिवच्या शासकीय वैद्यकीय महाविद्यालयामध्ये उपचार सुरू आहे. महिलेची प्रकृती गंभीर असल्याची माहिती डॉक्टरांनी दिली आहे.
