बुलढाणा : पत्नीच्या चारित्र्यावर संशय घेत पतीने झोपेत असलेल्या पत्नी व चार वर्षीय पोटच्या मुलास कुऱ्हाडीने वार करून ठार केले. मेहकर शहरातील शिक्षक कॉलनीमध्ये सोमवारी मध्यरात्री दोन वाजताच्या सुमारास ही घटना घडली.
काय घडलं?
रुपाली राहुल मस्के (३०) व रियांश राहुल मस्के (०४) अशी हत्या झालेल्या मायलेकाची नावे आहेत. आरोपी राहुल हरी मस्के (३३) यास मेहकर पोलिसांनी अटक केली आहे. झोपलेल्या अवस्थेत असतानाच राहुलने क्रूरतेचा कळस गाठत मायलेकाचा जीव घेतला. आपला पोटचा गोळा असलेल्या चिमुकल्या रियांशवर कुऱ्हाडीने घाव घालताना आरोपीचे हात थरथरले नाही. घटनेची माहिती समजताच ठाणेदार व्यंकटेश्वर आलेवार, एपीआय संदीप बिरांजे घटनास्थळी दाखल झाले. मुलीचे वडील भास्कर वानखेडे (रा. मोळा, ता. मेहकर) यांच्या तक्रारीवरून पोलिसांनी गुन्हा दाखल केला.
पोलिस बंदोबस्तात अंत्यसंस्कार
रुपाली व मुलगा रियांशचा खून झाल्याने माहेरची मंडळी संतप्त झाली आहे. नातेवाइकांचा रोष पाहता पोलिसांनी बंदोबस्त तैनात केला. मोळा येथे माहेरी मायलेकांवर अंत्यसंस्कार करण्यात आले.
तर दुसरीकडे, सासरकडील मंडळींनी चाकूने वार करून जावयाला ठार मारण्याचा प्रयत्न केला. ही थरारक घटना यशोधरानगर पोलिस ठाण्याच्या हद्दीतील यादवनगर येथे घडली. सुशील हरिश्चंद्र वासे (वय ३६, रा. यादवनगर) असे जखमीचे नाव आहे. गेल्या दोन वर्षांपासून सुशील यांच्या पत्नी माहेरी राहतात. २७ डिसेंबरला सकाळी पत्नीची समजूत घालून तिला परत घरी आणण्याकरिता सुशील हे सासरी गेले. परंतु, त्यांची पत्नी घरी आली नाही. सुशील घरी परतले. दुपारी २ वाजताच्या सुमारास सुशील हे घरी झोपले होते. सुशील यांच्या पत्नीचे नातेवाईक दोघे सुशील यांच्या घरी आले. विकासने चाकूने सुशील यांच्यावर वार केले व दोघेही पसार झाले. सुशील जखमी झाले. त्यांना मेयो हॉस्पिटलमध्ये दाखल करण्यात आले. याप्रकरणी पोलिसांनी प्राणघातक हल्ल्याचा गुन्हा दाखल करून दोघांना अटक केली.
