पुणे : पुणे महानगर परिवहन महामंडळाने (पीएमपीएमएल) पुण्यातील इंस्टाग्राम इन्फ्लुएन्सर याला कायदेशीर नोटीस बजावली आहे. पीएमपीएमएल बसमध्ये परवानगीशिवाय रील शूट करुन प्रसारित केल्याचा ठपका सुदामेवर ठेवण्यात आला आहे. परिवहन प्राधिकरणाची परवानगी घेणे अनिवार्य असतानाही अर्थवने महामंडळाच्या बसमध्ये एक रील रेकॉर्ड करत इन्स्टाग्रामवर शेअर केल्याचा आरोप अथर्व सुदामे याच्यावर आहे.
पीएमपीएमएलने बजावलेल्या नोटिशीनुसार अथर्व सुदामे याच्या व्हिडिओमध्ये महामंडळाचा गणवेश, ई-तिकिटिंग मशीन आणि अधिकृत बॅज यासह अधिकृत पीएमपीएमएल मालमत्तेचा अनधिकृत आणि बेकायदेशीर वापर करण्यात आला आहे. परिवहन विभागाने पुढे असेही म्हटले आहे की, या रीलमध्ये महिला वाहकांना आक्षेपार्ह आणि अपमानजनक पद्धतीने दाखवण्यात आले आहे. ही प्रतिष्ठा आणि व्यावसायिक प्रतिमेचा अपमान आहे.
पीएमपीएमएलच्या अधिकाऱ्यांनी सांगितले की, अशा प्रकारच्या आशयामुळे सार्वजनिक ठिकाणी काम करणाऱ्या महिला कर्मचाऱ्यांचा आदर, प्रतिष्ठा, मानसिक स्वास्थ्य आणि सार्वजनिक प्रतिमा यावर नकारात्मक परिणाम होतो. नोटिशीमध्ये पीएमपीएमएलने असा दावा केला आहे की, या रीलच्या प्रसारामुळे अत्यावश्यक सार्वजनिक सेवा पुरवणाऱ्या परिवहन महामंडळाच्या सार्वजनिक प्रतिमेला आणि विश्वासार्हतेला हानी पोहोचली आहे. प्रशासनाने नमूद केले की या कृतीमुळे महामंडळाचे अंतर्गत नियम, धोरणे आणि नैतिक मानके यांचे उल्लंघन झाले आहे आणि यामुळे संस्थेवरील लोकांचा विश्वास कमी होऊ शकतो.
या नोटीसमध्ये अथर्व सुदामे याला संबंधित रील इन्स्टाग्रामवरुन त्वरित काढून टाकण्याचे निर्देश दिले आहेत आणि प्राधिकरणाकडून पूर्व लेखी परवानगीशिवाय पीएमपीएमएल बसेस किंवा ऑपरेशन्सशी संबंधित कोणतेही छायाचित्र, व्हिडिओ, रील किंवा इतर सोशल मीडिया कंटेट प्रकाशित करण्यापासून त्यांना परावृत्त केले आहे.
याव्यतिरिक्त, अथर्वला नोटीस मिळाल्यापासून सात दिवसांच्या आत शंकरशेट रोड, स्वारगेट येथील पीएमपीएमएल मुख्यालयात हजर राहून लेखी स्पष्टीकरण सादर करण्याचे निर्देश देण्यात आले आहेत.
पीएमपीएमएलने इशारा दिले आहे की, नोटिसीने पालन न केल्यास किंवा समाधानकारक प्रतिसाद न दिल्यास लागू कायद्यांतर्गत पुढील कायदेशीर कारवाई केली जाईल. या घटनेमुळे सार्वजनिक वाहतूक व्यवस्थेतील कर्मचाऱ्यांच्या प्रतिष्ठेचा आणि कामाच्या वातावरणाचा आदर राखणे किती महत्त्वाचे आहे, हे अधोरेखित झाले आहे.
अथर्व सुदामे सोशल मिडिया पोस्टवरुन अडचणीत येण्याची ही पहिलीच वेळ नाही. गणेशोत्सवाच्या पार्श्वभूमीवर त्याने केलेल्या एका रीलवरुन वाद झाल्यामुळे त्याला माफी मागत व्हिडिओ डीलीट करावा लागला होता.
