मुंबई : लोकसभा निवडणुकीतील पराभवानंतर राष्ट्रवादी काँग्रेसने (अजित पवार गट) सुनेत्रा पवार यांची राज्यसभेवर वर्णी लावली आहे. सुनेत्रा पवार खासदार म्हणून शपथ घेण्याच्या तयारीत असतानाच, शिवसेना (उद्धव बाळासाहेब ठाकरे) पक्षाच्या नेत्या सुषमा अंधारे यांनी त्यांना एक अत्यंत खरमरीत खुले पत्र लिहिले आहे. या पत्राद्वारे अंधारे यांनी जुन्या भ्रष्टाचाराच्या आरोपांचा पुनरुच्चार करत सुनेत्रा पवार आणि महायुतीवर निशाणा साधला आहे.
पत्रात नेमकं काय म्हटलंय?
सुषमा अंधारे यांनी आपल्या पत्रात प्रधानमंत्री नरेंद्र मोदी यांनी राष्ट्रवादी काँग्रेसवर केलेल्या जुन्या आरोपांची आठवण करून दिली आहे. अंधारे लिहितात की, “काही वर्षांपूर्वी खुद्द प्रधानमंत्री मोदींनी भोपाळमधील सभेत राष्ट्रवादी काँग्रेसवर ७० हजार कोटी रुपयांच्या सिंचन घोटाळ्याचा आरोप केला होता. तसेच, २५ हजार कोटी रुपयांच्या शिखर बँक घोटाळ्याचाही उल्लेख करण्यात आला होता. मात्र, आता त्याच पक्षातील नेत्यांना राज्यसभेवर पाठवले जात आहे.”
‘क्लीन चिट’ आणि जरंडेश्वर कारखाना सुषमा अंधारे यांनी पत्रात जरंडेश्वर साखर कारखान्याचा आणि शिखर बँकेच्या कथित घोटाळ्याचाही उल्लेख केला आहे. “ज्या शिखर बँक घोटाळ्याचा तपास ईडी करत होती आणि ज्यामध्ये तुमच्यावर गंभीर आरोप होते, त्या प्रकरणात आता इकॉनॉमिक ऑफेन्सेस विंगने क्लोजर रिपोर्ट दाखल करून तुम्हाला ‘क्लीन चिट’ दिली आहे. योगायोगाने ही क्लीन चिट मिळणे आणि तुमची राज्यसभेवर निवड होणे, या गोष्टी एकाच वेळी घडत आहेत,” असे उपहासात्मक निरीक्षण अंधारे यांनी नोंदवले आहे.
नैतिकतेवर प्रश्नचिन्ह
राज्यसभेच्या पवित्र सभागृहात प्रवेश करताना जुन्या आरोपांचे काय झाले, असा सवाल या पत्रातून उपस्थित करण्यात आला आहे. “ज्या घोटाळ्यांचे आरोप करून भाजपने रान उठवले होते, आता त्याच भाजपच्या पाठिंब्याने तुम्ही संसदेत जात आहात. शपथ घेताना तुम्हाला त्या ७० हजार कोटींच्या घोटाळ्याच्या आरोपांची आठवण येईल का?” असा तीक्ष्ण सवाल सुषमा अंधारे यांनी विचारला आहे.
सुनेत्रा पवार यांनी बारामती लोकसभा मतदारसंघातून नणंद सुप्रिया सुळे यांच्या विरोधात निवडणूक लढवली होती, ज्यात त्यांचा पराभव झाला. त्यानंतर लगेचच पक्षाने त्यांना राज्यसभेची उमेदवारी जाहीर केली. या पार्श्वभूमीवर सुषमा अंधारे यांनी लिहिलेले हे पत्र सध्या राजकीय वर्तुळात चर्चेचा विषय ठरले आहे.
