मुंबई : महापालिकेच्या निवडणुका तोंडावर आल्या असताना काँग्रेस पक्ष मात्र मनसेला नवा भिडू म्हणून महाविकास आघाडीत समाविष्ट करुन घेण्यास तयार नाही. त्याचवेळी मतांची आकडेवारी पाहिल्यास, मनसेविना मुंबईत मविआचा खेळ जमणार नाही अशी म्हणण्याची वेळ आली आहे. २०२४ च्या निवडणुकांची आकडेवारी बघितल्यास मनसेला सोबत घेतल्यास महाविकास आघाडीला मोठा फायदा होणार असल्याचं दिसून येतंय. मुंबई महापालिकेच्या २२७ पैकी २२ वॉर्डात मनसेच्या मतांचा मविआला थेट फायदा होईल असं चित्र आहे.
दिंडोशी, गोरेगाव, वर्सोवा, जोगेश्वरी पूर्व, विलेपार्ले, कलिना, भांडुप, घाटकोपर पश्चिम, अणुशक्ती नगर, चांदीवली, माहीम या विधानसभा मतदारसंघातील २२ वॉर्डात मनसेच्या मतांचा मविआला फायदा होऊ शकतो असा अंदाज आहे. त्यामुळे मनसेबाबत सकारात्मक नसलेल्या काँग्रेसला आपला विरोध बाजूला ठेवत मनसेला सोबत घ्यावं लागतंय की मनसेबाबत सकारात्मक असलेले उद्धव ठाकरे आणि शरद पवार दुसरी कोणती भूमिका घेणार हे पाहणं महत्वाचं ठरणार आहे.
ठाकरेंची ताकद वाढली –
अर्थात ही आकडेवारी त्या विधानसभेतली आहे जेव्हा उद्धव ठाकरे आणि राज ठाकरेंची तोंडं दोन वेगवेगळ्या दिशेला होती. आता तर दोन्ही ठाकरेंची हातमिळवणी झाली आहे. त्यामुळे या आकडेवारीत महापालिका निवडणुकीत भर पडण्याची शक्यताच जास्त आहे. या समीकरणाचा फायदा घेण्यासाठी फक्त दोन ठाकरे एकत्र येणं पुरेसं नाही, तर मनसेला मविआत एन्ट्री मिळाली तर मतांची होणारी गोळाबेरीज महायुतीच्या चिंतेत भर घालणारी ठरू शकते.
जो मतांची गोळाबेरीज करण्यात यशस्वी ठरतो तोच निवडणूक जिंकतो. या आकड्यांची जुळवाजुळव करण्याच्या नादात किती अभद्र युत्या आणि आघाड्या जन्माला घातल्या हे महाराष्ट्राएवढं आणखी कुणीच जास्त अनुभवलं नसेल. आता प्रश्न हा आहे की बेरजेचं राजकारण करण्यासाठी कोणता पक्ष आपली मूळ विचारधारा आणि नैतिकतेची वजाबाकी करण्याची तयारी दाखवणार?
