मुंबई – वीण दोघातली ही तुटेना या मालिकेतून सध्या प्रेक्षकांच्या भेटीला येणाऱ्या तेजश्री प्रधान ने एक आनंदाची बातमी सोशल मीडियावर शेअर केली. अभिनेत्रीला अलिकडेच ‘महाराष्ट्र शासन सांस्कृतिक कार्य संचालनालय राज्य सांस्कृतिक युवा पुरस्कार २०२४’ हा पुरस्कार प्रदान करण्यात आला. अभिनेत्रीने यानिमित्ताने एक पोस्ट शेअर करत तिच्या भावना व्यक्त केल्या.
तेजश्री प्रधानने या पुरस्कार सोहळ्यातील काही क्षण सोशल मीडियावर शेअर केले आहेत. तिला सांस्कृतिक कार्य मंत्री आशिष शेलार यांच्या हस्ते हा पुरस्कार प्रदान करण्यात आला. यानिमित्ताने शेअर केलेल्या पोस्टमध्ये तेजश्रीने लिहिले की, ‘आपल्या मार्गावर विश्वास ठेवून पुढे चालत राहणे! यशासकट अन् अपयशासकट… न थकता… न डगमगता… उरी विश्वास बाळगून… की जाणारा प्रत्येक दिवस काहीतरी नवं देत राहतो!’
अभिनेत्री पुढे लिहिते, ‘ते सर्व वेचत चालत राहणे आणि मग, एक छानसा विसावा… त्यात थोडा आढावा! करून ठेवलेल्या गोष्टींचा… चुकलेल्याचा… बरोबर गोष्टींचा… मायबाप प्रेक्षकाच्या प्रेमाचा… टीकेचा… आपुलकी दाखवणाऱ्या सहकलाकारांचा… हितचिंतकांचा आणि निंदकांचा… मग अचानक कोणीतरी येतं आणि म्हणतं, “आमचं लक्ष आहे, तुमच्या वाटचालीवर” आणि मग मन पुन्हा नव्या जोमाने विश्वासाने पुढे चालू लागतं, पुन्हा एकदा!’
तेजश्रीने लिहिले की, ‘ह्या वेळी हे कोणीतरी फार महत्वाचं आहे माझ्या कलाक्षेत्रातल्या प्रवासासाठी. महाराष्ट्र शासन सांस्कृतिक कार्य संचालनालय राज्य सांस्कृतिक युवा पुरस्कार 2024. महाराष्ट्र शासनाचे आणि माननीय मंत्री, सांस्कृतिक कार्य, माननीय ॲड. आशिष शेलार यांचे खूप खूप आभार या केलेल्या सन्मानासाठी.’
दरम्यान तेजश्रीने ही पोस्ट शेअर केल्यानंतर चाहत्यांकडून तिच्यावर शुभेच्छांचा वर्षाव झाला आहे. अभिनेत्रीने 4 डिसेंबर रोजी शेअर केलेल्या पोस्टवर चाहत्यांच्या असंख्य कमेंट आल्या आहेत. तर चाहत्यांसह किशोरी अंबिये, ऋतुजा बागवे, छाया कदम या तिच्या कलाविश्वातील मैत्रिणींनीही तिचे अभिनंदन केले.
तसेच तेजश्रीच्या कामाबद्दल सांगायचे झाल्यास सध्या ती झी मराठीवरील ‘वीण दोघांतली ही तुटेना’ मालिकेत स्वानंदी हे पात्र साकारते आहे. तिच्यासह अभिनेता सुबोध भावे मुख्य भूमिकेत आहे. याशिवाय ती अलिकडेच तिचा ‘असा मी अशी मी’ हा सिनेमा रीलिज झाला. ज्यामध्ये अभिनेते अजिंक्य देव यांच्यासोबत तिची रोमँटिक केमिस्ट्री पाहायला मिळाली आहे.
