पुणे : आगामी महापालिका निवडणुकीच्या पार्श्वभूमीवर पुण्याच्या राजकारणात मोठ्या हालचाली सुरू झाल्या आहेत. महापालिका निवडणुकीसाठी १५ जानेवारीला मतदान होत असून १६ जानेवारीला याचा निकाल लागणार आहे. आजपासून उमेदवारी अर्ज दाखल करण्याच्या प्रक्रियेला सुरुवात झाली असली तरी महायुतीमधील जागावाटपाचा तिढा अद्याप सुटलेला नाही. मात्र जागावाटपाचा तिढा कायम असताना देखील भारतीय जनता पक्षाने आपल्या रणनीतीनुसार ६२ उमेदवारांची पहिली यादी तयार केल्याची माहिती भाजपमधील उच्चपदस्थ सूत्रांनी दिली आहे.
ख्रिसमसच्या दुसऱ्या दिवशी म्हणजेच २६ डिसेंबरला भारतीय जनता पक्षाची उमेदवारांची पहिली यादी अधिकृतपणे जाहीर होण्याची शक्यता आहे. पुण्यातील जागांच्या गणितावर शिक्कामोर्तब करण्यासाठी मंगळवारी मुंबईत एक उच्चस्तरीय बैठक बोलावण्यात आली आहे. या बैठकीत महायुतीमधील मित्रपक्ष असलेल्या शिवसेनेसोबतच्या जागावाटपावर अंतिम चर्चा होणार आहे. विशेष म्हणजे, या बैठकीपूर्वी पुण्यातील आणखी काही बड्या माजी नगरसेवकांचा भाजप प्रवेश निश्चित मानला जात असून, यामुळे पक्षाची ताकद अधिक वाढणार आहे.
दरम्यान, गेल्या निवडणुकीत ज्या प्रभागांमध्ये भाजपचे कमळ फुलले होते, त्या जागांवर कोणताही धोका पत्करण्यास पक्ष तयार नाही. सध्या भाजपकडे १०५ माजी नगरसेवक आणि इतर पक्षांतून आलेले एकूण १२६ जणांचे संख्याबळ आहे. त्यामुळे भाजप किमान १२६ जागांवर आपला दावा ठाम ठेवणार असल्याचे चित्र आहे. तर भाजपने स्वबळावर १२० पेक्षा जास्त जागा जिंकण्याचे लक्ष्य ठेवले आहे.
महायुतीमधील सहभागी शिवसेनेने भाजपकडे ३५ जागांचा आग्रह धरला आहे. मात्र, जर महाविकास आघाडीमध्ये राष्ट्रवादी काँग्रेससोबत मनसेचीही युती झाली, तर भाजपला अधिक जागांवर लढावे लागेल. अशा परिस्थितीत शिवसेनेच्या वाट्याला केवळ १५ ते २० जागाच येऊ शकतात, असा अंदाज स्थानिक स्तरावर वर्तवला जात आहे. त्यामुळे मित्रपक्षाला किती जागा सोडायच्या, याचा पेच वरिष्ठ नेत्यांच्या दरबारी सुटण्याची चिन्हे आहेत.
