विश्व् – गेल्या अनेक दिवसांपासून इराणमध्ये तणावाची परिस्थिती आहे. तेथील दिवसेंदिवस राजकीय अस्थिरता, हिंसक निदर्शने आणि बिघडलेल्या सुरक्षा परिस्थितीमुळे, भारत सरकारने आपल्या नागरिकांसाठी एक महत्त्वाची सल्लागार सूचना जारी केली आहे. तेहरान येथील भारतीय दूतावासाने इराणमध्ये असलेल्या सर्व भारतीय नागरिकांना, त्यात व्यावसायिक, विद्यार्थी, तीर्थयात्री, व्यावसायिक किंवा पर्यटक आदींचा समावेश आहे. त्यांनी उपलब्ध साधनांचा वापर करून शक्य तितक्या लवकर देश सोडण्याचे आवाहन सरकारने केले आहे.
अमेरिका करणार कारवाई?
इराणमध्ये सुरू असलेल्या तणावाच्या पार्श्वभूमीवर अमेरिकेकडूनही कारवाई करण्याची धमकी देण्यात येत आहे. कतारमधील एअरबेसही कार्यन्वित करण्यात आले आहे. भारताकडून दिलेल्या सूचना ५ जानेवारी २०२५ रोजी जारी केलेल्या भारत सरकारच्या सूचनांचा विस्तार आहे. इराण मधील सतत बदलणाऱ्या परिस्थितीचा विचार करता, भारतीय नागरिकांना व्यावसायिक उड्डाणांसह उपलब्ध असलेल्या कोणत्याही वाहतूक साधनांचा वापर करून इराण सोडण्याचा सल्ला दिला जातो.”
दूतावासाच्या महत्त्वाच्या सूचना
भारतीय दूतावासाने इराणमधील सर्व भारतीय नागरिक आणि पीआयओ यांना पूर्णपणे सतर्क राहण्यास सांगितले आहे. कोणत्याही प्रकारच्या निदर्शनांपासून किंवा गर्दीच्या ठिकाणांपासून दूर राहण्याचा सल्ला देण्यात आला आहे. तसेच, परिस्थितीबद्दल ताजे अपडेट्स मिळवण्यासाठी स्थानिक माध्यमांवर लक्ष ठेवण्यासही सांगण्यात आले आहे. भारतीय नागरिकांना त्यांच्या प्रवासाशी आणि इमिग्रेशनशी संबंधित सर्व कागदपत्रे, जसे की पासपोर्ट आणि ओळखपत्रे, नेहमी सोबत आणि सहज उपलब्ध ठेवण्याचे आवाहन दूतावासाने केले आहे.
संपर्क क्रमांक जारी
कोणत्याही प्रकारच्या मदतीची आवश्यकता भासल्यास त्वरित भारतीय दूतावासाशी संपर्क साधण्यास सांगण्यात आले आहे.आणीबाणीच्या काळात मदतीसाठी भारतीय दूतावासाने काही मोबाईल नंबर देखील जारी केले आहेत. या नंबरवर भारतीय नागरिक संपर्क साधू शकतात: +989128109115, +989128109109, +989128109102 आणि +98932179359.
इराणमध्ये सुरू असलेल्या आंदोलनात तब्बल २ हजार लोकांचा मृत्यू झाला असल्याचे समोर आले आहे. हा आकडा वाढण्याची भीती व्यक्त केली जात आहे. देशातील बिघडलेली आर्थिक स्थिती आणि सामाजिक बंधने यामुळे आंदोलन केले जात आहे.
