शेगाव (बुलढाणा) : विदर्भाची पंढरी आणि संत गजानन महाराजांची पावनभूमी म्हणून ओळखल्या जाणाऱ्या शेगाव नगरीतून एक अतिशय संतापजनक आणि माणुसकीला काळीमा फासणारी घटना समोर आली आहे. शेगावात गजानन महाराजांच्या दर्शनासाठी आलेल्या एका १९ वर्षीय तरुणीवर एका तरुणाने लॉजवर नेऊन अत्याचार करण्याचा प्रयत्न केल्याचा धक्कादायक प्रकार उघडकीस आला आहे. या घटनेमुळे संपूर्ण शहरात संतापाची लाट उसळली आहे.
मिळालेल्या माहितीनुसार, सदर पीडित १९ वर्षीय तरुणी ही गजानन महाराजांच्या समाधी दर्शनासाठी शेगाव येथे आली होती. यावेळी आरोपी तरुणाने तिला “तुझ्याशी थोडे बोलायचे आहे,” असे सांगून विश्वासात घेतले आणि तिला शहरातील एका लॉजवर नेले. लॉजवर गेल्यानंतर आरोपीने तरुणीसोबत लगट करण्याचा प्रयत्न करत अश्लील चाळे सुरू केले. तरुणीने त्याला विरोध केला असता, नराधम आरोपीने तिला अमानुषपणे बेदम मारहाण केली.
या दुर्दैवी घटनेनंतर पीडित तरुणीने पोलीस ठाण्यात धाव घेत तक्रार दाखल केली. या तक्रारीची गंभीर दखल घेत शेगाव शहर पोलिसांनी तातडीने चक्र फिरवली आणि आरोपी तरुणाच्या मुसक्या आवळल्या आहेत. आरोपीला पोलिसांनी बेड्या ठोकल्या असून त्याच्यावर कठोर कारवाई करण्याची मागणी नागरिकांकडून होत आहे. या घटनेमुळे महिलांच्या सुरक्षेचा प्रश्न पुन्हा एकदा ऐरणीवर आला असून, पवित्र मानल्या जाणाऱ्या संतनगरीत अशा प्रकारची घटना घडल्याने सर्वत्र हळहळ व्यक्त केली जात आहे. पोलीस या प्रकरणाचा अधिक तपास करत आहेत.
