मुंबई : पंतप्रधान नरेंद्र मोदी यांच्या हस्ते पीएम किसान सन्मान निधी योजनेच्या २१व्या हप्त्याचे बुधवारी वितरण करण्यात आले. या योजनेंतर्गत राज्यातील एकूण ९० लाख ४१ हजार २४१ पात्र शेतकऱ्यांच्या खात्यात १,९०९.२५ कोटी रुपयांची रक्कम जमा होणार असल्याची माहिती राज्याचे कृषिमंत्री दत्तात्रय भरणे यांनी बुधवारी दिली. या नवीन २१व्या हप्त्यामुळे राज्यातील शेतकऱ्यांना लागवड, बियाणे, उपजीविका आणि इतर कृषी खर्चासाठी आवश्यक असे तातडीचे आर्थिक बळ मिळणार आहे, असे ते म्हणाले.
केंद्र सरकारच्या पीएम किसान योजनेंतर्गत शेतकऱ्यांना निश्चित वार्षिक उत्पन्न साह्य मिळावे या उद्देशाने सुरू करण्यात आली आहे. या योजनेनुसार पात्र शेतकरी कुटुंबांना दरवर्षी ६ हजार रुपयांची आर्थिक मदत दिली जाते. ही मदत दोन हजार रुपयांच्या तीन समान हप्त्यांमध्ये डीबीटीमाध्यमातून शेतकऱ्यांच्या बँक खात्यांत जमा केली जाते. त्यानुसार या योजनेच्या २१व्या हप्त्याचे वितरण बुधवारी करण्यात आले.
याबद्दल भरणे यांनी अधिक माहिती दिली. महाराष्ट्रात या योजनेचा मोठा लाभार्थी वर्ग असून, एकूण ९०,४१,२४२ पात्र शेतकरी कुटुंबांच्या खात्यात सुमारे १ हजार ८०८ कोटी २५ लाखांची रक्कम जमा होणार आहे. राज्यातील सर्व जिल्ह्यांमध्ये कृषी विभाग, महसूल विभाग तसेच बँकिंग यंत्रणेने समन्वय राखत हप्त्याचे वितरण वेळेवर पार पाडण्यासाठी तयारी पूर्ण केली आहे. तसेच, शेतकऱ्यांना हप्ता मिळाला आहे की नाही हे तपासण्यासाठी सरकारने अधिकृत पोर्टल आणि मोबाइल ॲप द्वारे सुविधा उपलब्ध करून दिल्या आहेत, असे त्यांनी यावेळी स्पष्ट केले.
ते पुढे म्हणाले की, पीएम किसान योजना ही देशातील सर्वात व्यापक थेट आर्थिक सहाय्य योजना मानली जाते. योजनेमुळे शेतकऱ्यांच्या हातात नियमित अंतराने रोख रक्कम उपलब्ध होते, ज्यामुळे कर्जाची गरज कमी होते तसेच शेतीतील तातडीच्या खर्चाला मदत मिळते.
मागील हप्त्यांमध्ये डीबीटी प्रक्रियेचे पारदर्शक व्यवहार, लाभार्थ्यांच्या माहितीचे आधार लिंक केल्यामुळे आणि बँक पडताळणीमुळे योजना अधिक सक्षम झाली आहे. तसेच, नियमित आर्थिक सहाय्यामुळे लहान व मध्यम शेतकऱ्यांना त्यांच्या हंगामी आर्थिक नियोजनात दिलासा मिळतो आणि शेतकरी कुटुंबांच्या उपजीविका सुरक्षित राहण्यास मदत होते, असे त्यांनी यावेळी नमूद केले.
