नवी दिल्ली : रशियाचे अध्यक्ष व्लादिमीर पुतीन भारत दौऱ्यावर आहेत. त्यांच्या सन्मानार्थ आज रात्री भोजनाचं आयोजन करण्यात आलं आहे. मात्र या कार्यक्रमाला विरोधी पक्षनेते राहुल गांधी यांना निमंत्रण देण्यात आलेलं नाही. काँग्रेसचे अध्यक्ष मल्लिकार्जुन खरगे यांनाही कार्यक्रमाचं निमंत्रण नाही. परदेशातून येणाऱ्या राष्ट्र प्रमुखांना भेटण्याची परवानगी मोदी सरकार देत नाही, असा आरोप राहुल गांधी यांनी कालच केला होता. त्यानंतर आज महत्त्वाची घडामोड समोर आली आहे.
रशियाचे अध्यक्ष पुतीन कालच भारतात दाखल झाले. संध्याकाळी सातच्या सुमारास त्यांचं दिल्लीतील पालम विमानतळावर आगमन झालं. यानंतर आज भारत आणि रशिया यांच्यात अनेक करार झाले. पुतीन यांच्या दौऱ्याची सांगता उद्या होणार आहे. त्याआधी त्यांच्या सन्मानार्थ आज रात्री भोजनाचं आयोजन करण्यात आलं आहे. मात्र या कार्यक्रमाचं निमंत्रण काँग्रेसचे अध्यक्ष मल्लिकार्जुन खरगे आणि लोकसभेतील विरोधी पक्षनेते राहुल गांधी यांना देण्यात आलेलं नाही. विशेष म्हणजे काँग्रेसचे नेते आणि लोकसभेतील खासदार शशी थरुर यांनी निमंत्रण देण्यात आलेलं आहे.
परदेशातून आलेल्या राष्ट्र प्रमुखांना भेटायला दिलं जात नाही. लोकसभेतील विरोधी पक्षनेते असतानाही राष्ट्र प्रमुखांची भेट नाकारली जाते, असा आरोप राहुल गांधी यांनी कालच केला होता. आधीच्या सरकारांमध्ये अशी पद्धत नव्हती. मनमोहन सिंग, अटल बिहारी वाजपेयी प्रधानमंत्री असताना तत्कालीन विरोधी पक्षनेत्यांना भारत दौऱ्यावर असलेल्या राष्ट्र प्रमुखांना भेटण्याची परवानगी दिली जात होती, असं राहुल गांधी म्हणाले होते. ‘आज काल परदेशी पाहुणे, राष्ट्र प्रमुख भारतात आल्यावर त्यांना भेटण्याची संधी विरोधी पक्ष नेत्याला दिली जात नाही,’ असा दावा राहुल यांनी केला होता.
सरकारी सुत्रांनी राहुल गांधींचे आरोप निराधार असल्याचं म्हटलं आहे. ९ जून २०२४ रोजी राहुल गांधी लोकसभेतील विरोधी पक्षनेते झाले. त्यानंतर आतापर्यंत त्यांनी चार राष्ट्राध्यक्षांची भेट घेतली आहे. यामध्ये बांग्लादेशच्या तत्कालीन प्रधानमंत्री शेख हसीना यांचाही समावेश असल्याचं सरकारकडून सांगण्यात आलं आहे. परदेशातून आलेल्या राष्ट्र प्रमुखांना कोणी भेटायचं, याचा निर्णय परराष्ट्र मंत्रालय घेत नाही. याबद्दलचा निर्णय भारतात आलेलं शिष्टमंडळ घेत असं स्पष्टीकरण सरकारकडून देण्यात आलं आहे.
