बेंगळूरू – शाहरुख खानचा मुलगा आणि “बॅड्स ऑफ बॉलिवूड” चा दिग्दर्शक आर्यन खान पुन्हा एकदा अडचणीत आला आहे. सोशल मीडियावर त्याचा एक व्हिडिओ व्हायरल झाला आहे, ज्यामध्ये बेंगळुरूमधील एका पबमध्ये मधले बोट दाखवल्याचा त्याच्यावर आरोप आहे. त्याच्या या कृत्यामुळे मोठ्या प्रमाणात खळबळ उडाली आहे. एका वकिलाने त्याच्याविरुद्ध तक्रार दाखल केली आहे आणि त्याच्यावर अश्लील वर्तनाचा आरोप केला आहे.
२८ नोव्हेंबर रोजी आर्यन खान एका खाजगी कार्यक्रमासाठी बेंगळुरूला गेला होता. या दरम्यान, तो अशोक नगर पोलीस स्टेशनजवळील एका पबमध्ये दिसला. तिथला एक व्हिडिओ आता व्हायरल झाला आहे, ज्यामध्ये तो मधले बोट दाखवत आहे. त्याच्या या कृत्याने सर्वांचे लक्ष वेधून घेतले आहे. व्हायरल व्हिडिओमध्ये बॉलिवूड सुपरस्टार शाहरुख खानचा मुलगा कन्नड अभिनेता जैद खान, गृहनिर्माण आणि मंत्री जमीर अहमद खान यांचा मुलगा आणि काँग्रेस नेते मोहम्मद नालापद, काँग्रेसचे ज्येष्ठ आमदार एनए हरिस यांचा मुलगा यांच्यासोबत बेंगळुरूमधील एका पबमध्ये जाताना दिसत आहे.
सुरुवातीला तो जमलेल्या गर्दीला आनंदाने हात हलवत अभिवादन करतो. पण नंतर तो मधले बोट दाखवत हसत होता. वृत्तसंस्था आयएएनएसकडून मिळालेल्या माहितीनुसार, बेंगळुरू पोलिसांनी पबला भेट दिली आणि आर्यन खान मधले बोट दाखवत असल्याच्या कथित व्हिडिओबाबत त्याच्या मॅनेजरशी चौकशी केली.
आर्यन खान जामिनावर बाहेर
पोलीस सूत्रांनी दिलेल्या माहितीनुसार, ही कथित घटना 28 नोव्हेंबर रोजी बेंगळुरूमधील अशोकनगर पोलीस स्टेशनच्या हद्दीत असलेल्या एका प्रसिद्ध पबमध्ये घडली. या घटनेची अधिक माहिती अद्याप समोर आलेली नाही. पोलिसांनी अद्याप अधिकृत निवेदन जारी केलेले नाही. ३ ऑक्टोबर २०२१ रोजी, क्रूझ जहाजावरील रेव्ह पार्टीवर छापा टाकताना नार्कोटिक्स कंट्रोल ब्युरोने आर्यनला व इतर सहा जणांना अटक केली होती. मुंबई सेंट्रल येथील जेलमध्ये २५ दिवस घालवल्यानंतर आणि चार वेळा जामीन नाकारल्यानंतर, २८ ऑक्टोबर २०२१ रोजी त्याला जामीन मंजूर करण्यात आला.
