गडचिरोली : भारत सरकारच्या युवा कार्यक्रम व क्रीडा मंत्रालयांतर्गत माय भारत (MY Bharat) यांच्या वतीने राबविण्यात येणाऱ्या ‘व्यसनमुक्त युवा – विकसित भारत संकल्प अभियान’ अंतर्गत आज समाज कल्याण कार्यालय, गडचिरोली येथे पंतप्रधान नरेंद्र मोदी यांच्या आभासी संवाद कार्यक्रमाचे आयोजन करण्यात आले. कार्यक्रमाला युवक-युवतींसह विविध शासकीय विभागांचे अधिकारी व कर्मचारी मोठ्या संख्येने उपस्थित होते.
कार्यक्रमादरम्यान उपस्थित युवकांनी पंतप्रधानांचा संदेश ऐकून व्यसनमुक्त भारताच्या संकल्पनेला उत्स्फूर्त प्रतिसाद दिला. यावेळी सुमारे २५० युवक-युवतींनी व्यसनमुक्तीची शपथ घेऊन व्यसनमुक्त समाज निर्मितीसाठी सक्रिय योगदान देण्याचा संकल्प केला.
या प्रसंगी समाज कल्याण विभागाचे सहाय्यक आयुक्त डॉ. सचिन मडावी यांनी युवकांना व्यसनमुक्त जीवनशैली स्वीकारण्याचे तसेच समाजात व्यसनमुक्तीबाबत व्यापक जनजागृती करण्याचे आवाहन केले.
जिल्हा युवा अधिकारी, माय भारत, गडचिरोली श्री. सारंग मेश्राम यांनी ‘व्यसनमुक्त युवा – विकसित भारत संकल्प अभियान’ अंतर्गत पुढील १०० आठवड्यांमध्ये जिल्ह्यात जनजागृती, क्रीडा, सांस्कृतिक आणि सामाजिक उपक्रमांचे आयोजन करण्यात येणार असून युवकांनी या उपक्रमांमध्ये सक्रिय सहभाग नोंदवावा, असे आवाहन केले.
कार्यक्रमास माय भारत स्वयंसेवक, राष्ट्रीय सेवा योजना (NSS) स्वयंसेवक, युवक मंडळांचे सदस्य, विद्यार्थी तसेच विविध शासकीय विभागांचे अधिकारी व कर्मचारी उपस्थित होते.
कार्यक्रमाच्या यशस्वी आयोजनासाठी माय भारतचे कु. गौरी सेलोटे व श्री. आकाश मेश्राम यांनी विशेष परिश्रम घेतले.
(स्रोत – जिल्हा माहिती कार्यालय, गडचिरोली.)
Author: विवेक गंगाधरराव राऊत
लेखक सा. रयत रक्षक व रयत रक्षक न्यूज, महाराष्ट्र. चे मुख्य संपादक असून स्वतः प्रकाशक व मालक आहेत. त्यांना मागील 20 वर्षांपासून सामाजिक व राजकीय क्षेत्राचा प्रदीर्घ अनुभव व पत्रकारिता क्षेत्रातील मागील 9 वर्षाचा अनुभव आहे. आपल्या लेखणीतून ते नेहमी रयतेचे हित जोपसण्याचे कार्य करतात.
