मुंबई: बॉलिवूडमध्ये सध्या ड्रग्ज प्रकरणामुळं एकच खळबळ उडाली आहे. मोठ मोठ्या सेलिब्रिटींचे धाबे दणाणले आहेत. सेलिब्रिटींची मित्र ओरी याला मुंबई पोलिसांनी ड्रग्ज पार्टी प्रकरणात समन्स बजावले होते. आता एका लोकप्रिय अभिनेत्रीच्या भावालाही पोलिसांनी चौकशीसाठी समन्स धाडले आहेत.
देशविदेशातील ड्रग्ज पार्ट्यांमध्ये कलाकार आणि राजकीय नेत्यांची नावे समोर आल्यानंतर मुंबई पोलिसांच्या तपासाला वेग आल्याचं पाहायला मिळत आहे. अमली पदार्थविरोधी पथकानं लोकप्रिय इन्फ्लुएन्सर ओरी उर्फ ओरहान याच्यानंतर अभिनेत्री श्रद्धा कपूर हिचा भाऊ सिद्धांत कपूर याला चौकशीसाठी समन्स पाठवले आहे. सिद्धांत याला मंगळवारी जबाब देण्यासाठी हजर राहण्यास सांगण्यात आलं आहे.
बडे सेलिब्रिटी आणि राजकीय नेते अडचणीत?
अमली पदार्थ विरोधी पथकानं सुमारे अडीचशे एमडी ड्रग्ज प्रकरणात संयुक्त अमिरातीहून प्रत्यार्पण करून आणलेला आरोपी मोहम्मद सलीम मोहम्मद सुहेल शेख याने बॉलिवूडच्या अनेक लोकप्रिय आणि बड्या कलाकारांसाठी तसंच राजकीय नेते यांच्यासाठी देशात आणि विदेशात ड्रग्ज पार्ट्या आयोजित केल्याचा खुलासा पोलिस चौकशीत केल्यानं चर्चेला उधाण आलंय. या प्रकरणाचा कॉलवर तपास सुरू करून सलीम यानं नावं घेतलेल्यांना चौकशीसाठी बोलावण्यास सुरुवात केली आहे.
काय आहे नेमकं प्रकरण?
तर मुंबई पोलिसांनी १६ फेब्रुवारी २०२४ रोजी कुर्ला इथून परवीन बानो गुलाम शेख या महिलेला २५ कोटी रुपयांच्या मेफेड्रॉनसह (एमडी) अटक केली होती. तपासामध्ये विक्रेत्यांपासून उत्पादकांपर्यंत मोठी साखळी उघडकीस आली आणि सुमारे २५० कोटी रुपये एमडीसह या प्रकरणात पोलिसांनी जवळपास १५ जणांना अटक करण्यात आली. परवीनला मिरा रोड इथला साजिद मोहम्मद आसिफ शेख हा अमली पदार्थ पुरवत असल्याचं समोर आलं होतं.पोलिसांनी साजिदला अटक केली.
पार्ट्यांचे आयोजन यांच्यासाठी…
श्रद्धा कपूर, तिचा भाऊ सिद्धार्थ, निर्माता दिग्दर्शक अब्बास-मस्तान, माजी आमदार झिशान सिद्दीकी, अभिनेत्री आणि नृत्यांगना नोरा फतेही, इन्फ्लुएन्सर ओरी उर्फ ओरहान, दाऊदची बहीण हसीना पारकरचा मुलगा अलीशाह, रॅपर लोका आदी.
