अहिल्यानगर : अहिल्यानगर जिल्ह्यातील जामखेड इथं एका नृत्यांगनेनं साई लॉजमध्ये गळफास घेऊन आत्महत्या केल्याची धक्कादायक घटना उघडकीस आली आहे. दिपाली गोकुळ पाटील असं या 35 वर्षीय महिलेचं नाव असून सदर महिला कल्याण येथील रहिवासी असून त्या जामखेडमध्ये एका कलाकेंद्रात नृत्यांगना म्हणून काम करत होत्या. गुरुवारी सकाळी मैत्रिणींना बाजारात जाऊन येते, असं सांगून त्या बाहेर पडल्या होत्या. मात्र परत न आल्याने मैत्रिणींनी त्यांचा शोध घेतला. रिक्षाचालकाने त्यांना साई लॉजमध्ये सोडल्याचे सांगितल्यावर मैत्रिणी लॉजमध्ये पोहोचल्या. डुप्लिकेट चावीने दरवाजा उघडल्यावर दिपाली यांनी पंख्याला गळफास घेतल्याचं आढळून आलं. या घटनेने शहरात खळबळ उडाली असून आमदार रोहित पवार यांनी या प्रकरणाची सखोल चौकशी करण्याची मागणी केली आहे.
पोलिसांनी दिलेल्या माहितीनुसार, दिपाली पाटील या काही मैत्रिणींसोबत तपनेश्वर भागात राहत होत्या. गुरुवारी सकाळी त्या मैत्रिणींना ‘मी बाजारात जाऊन येते’ असं सांगून बाहेर पडल्या. मात्र, बराच वेळ उलटूनही त्या परत न आल्याने मैत्रिणींनी त्यांची शोधाशोध सुरू केली. ज्या रिक्षाने त्या साई लॉजपर्यंत गेल्या होत्या, त्या रिक्षाचालकाकडून चौकशी केली असता त्याने त्यांना लॉजमध्ये सोडल्याचं सांगितलं. सायंकाळी मैत्रिणी लॉजमध्ये पोहोचल्या तेव्हा त्यांनी पाहिले की रूम आतून बंद होती. लॉज कर्मचाऱ्यांनी डुप्लिकेट चावीने दरवाजा उघडला असता, दिपाली यांनी पंख्याला गळफास घेतल्याचं धक्कादायक दृश्य दिसलं. पोलिसांनी मृतदेह ताब्यात घेऊन जामखेड ग्रामीण रुग्णालयात शवविच्छेदनासाठी पाठवला.
या प्रकरणी दिपालीची मैत्रीण हर्षदा रविंद्र कामठे हिने दिलेल्या तक्रारीवरून जामखेड पोलीस स्टेशनमध्ये अकस्मात मृत्यूची नोंद करण्यात आली आहे. पोलीस निरीक्षक दशरथ चौधरी यांच्या मार्गदर्शनाखाली या प्रकरणाचा तपास सुरू आहे.
रोहित पवारांकडून चौकशीची मागणी
आमदार रोहित पवार यांनी या घटनेनंतर सोशल मीडियावर पोस्ट लिहीत जामखेडमधील अवैध धंदे आणि गुन्हेगारीवर गंभीर प्रश्नचिन्ह उपस्थित केलं आहे. त्यांनी म्हटलं आहे की, “दिपाली पाटील आत्महत्या करण्यापूर्वी तिच्यासोबत कोण होते? त्या व्यक्तीचे संबंध कोणाशी आहेत? त्याला कोणत्या उच्चपदस्थांचा पाठिंबा आहे? त्याच्या कुटुंबातील व्यक्तीने कोणत्या पक्षाकडून निवडणूक लढवली? याचे तपशील पोलिसांनी सीसीटीव्ही फुटेज ताब्यात घेऊन शोधावे,” अशी मागणी त्यांनी केली आहे. तसेच, हे प्रकरण दडपण्याचा प्रयत्न झाल्यास तो यशस्वी होऊ देणार नाही, असा इशाराही पवार यांनी दिला आहे.
दरम्यान, दिपाली पाटील यांनी आत्महत्या का केली, याबाबत अनेक प्रश्न निर्माण झाले आहेत. या प्रकरणाचा सखोल तपास होण्याची गरज व्यक्त केली जात आहे. लॉजमधील सीसीटीव्ही फुटेज, फोन कॉल डिटेल्स आणि दिपालीच्या संपर्कात असलेल्या व्यक्तींची चौकशी या सर्व गोष्टी तपासाचा मुख्य भाग ठरणार आहेत. यातूनच नृत्यांगनेच्या मृत्यूमागील रहस्य उलगडण्यास मदत होईल, असं बोललं जात आहे.
