मुंबई – ट्रम्प यांनी त्यांचे सैन्य व्हेनेझुएलाला पाठवून तेथील राष्ट्रपतींना अमेरिकेत नेले हे आम्ही पाहिले. भारतही असेच काही करू शकतो, असे एआयएमआयएमचे प्रमुख असदुद्दीन ओवैसी यांनी म्हटलं आहे. पीएम मोदींचा उल्लेख करत ओवेसी म्हणाले, “मोदीजी, आम्ही तुम्हाला सांगत आहोत की २६/११ च्या दहशतवादी हल्ल्यातील गुन्हेगारांची, मग तो मसूद अझहर असो किंवा लष्कर-ए-तोयबाचा क्रूर सैतान असो, जर तुमची छाती ५६ इंचाची आहे, तर तुम्ही ते केलं पाहिजे, त्यांना उचलून भारतात आणा. ट्रम्प करू शकतात तर तुम्ही कमी आहात का? ते करू शकतात, तर तुम्हाला करावंच लागेल, कारण तुम्हीच म्हणाला होता अब की बार ट्रम्प सरकार.
मुंबईत एका जाहीर सभेला संबोधित करताना ओवैसी यांनी हे विधान केले. एआयएमआयएमच्या प्रमुखांनी त्यांच्या विधानात व्हेनेझुएलाचा उल्लेख केला. २ जानेवारीच्या रात्री अमेरिकन सैन्याने व्हेनेझुएलावर हल्ला केला आणि अध्यक्ष निकोलस मादुरो आणि त्यांची पत्नी सिलिया फ्लोरेस यांना ताब्यात घेतलं आहे. अमेरिकेने तिसऱ्यांदा राष्ट्रपती किंवा हुकूमशहाला ताब्यात घेतले आहे.
१९८९ मध्ये लॅटिन अमेरिकन देश पनामावर आक्रमण
अमेरिकेने एखाद्या देशाच्या राष्ट्राध्यक्ष किंवा हुकूमशहाला पकडण्यासाठी लष्करी कारवाई करण्याची ही पहिलीच वेळ नाही. २००३ मध्ये इराकमध्ये आणि १९८९ मध्ये पनामामध्ये अशाच प्रकारच्या कारवाया करण्यात आल्या. १९८९ मध्ये अमेरिकेने लॅटिन अमेरिकन देश पनामावर आक्रमण केले. अमेरिकेने पनामाचा हुकूमशहा मॅन्युएल नोरिएगा यांना सत्तेवरून काढून टाकले, ज्यांच्यावर ड्रग्ज तस्करी आणि अमेरिकाविरोधी कारवायांचा आरोप होता. या हल्ल्यात अमेरिकन सैन्याने पनामा सिटीसह अनेक भागात बॉम्बहल्ला केला, ज्यामध्ये सुमारे २००० लोक मारले गेले. नोरिएगा यांना अटक करून अमेरिकेत नेण्यात आले.
इराक, २००३ : अमेरिकेने इराकवर आक्रमण केले
इराकी राष्ट्राध्यक्ष सद्दाम हुसेन यांना सत्तेवरून काढून टाकणे हा उद्देश होता, ज्यांच्यावर अमेरिकेने इराकमधील विविध समुदायांविरुद्ध हिंसाचार, अल-कायदाला पाठिंबा आणि अण्वस्त्रे बाळगल्याचा आरोप केला होता. अमेरिकेच्या सैन्याने बगदादसह अनेक शहरांवर बॉम्बहल्ला केला आणि सद्दामचे सरकार पाडण्यात आले. काही महिन्यांनंतर सद्दाम हुसेनला पकडण्यात आले. त्यानंतर सद्दामवर इराकी न्यायालयात खटला चालवण्यात आला. या काळात इराक अमेरिकेच्या लष्कराच्या नियंत्रणाखाली होता.
