दिल्ली : खासदार राघव चड्डा यांच्यासह आम आदमी पार्टीच्या ७ राज्यसभा खासदारांनी भाजपमध्ये प्रवेश करण्याचा निर्णय घेतला आहे. राघव चड्डा कोण आहेत? ते राजकारणात येण्यापूर्वी काय करत होते याबाबत माहिती जाणून घेऊयात.
देशाच्या राजकारणात पुन्हा एकदा मोठा राजकीय भूकंप झाला आहे. अरविंद केजरीवाल यांच्या आम आदमी पार्टीला मोठा धक्का बसला असून ७ राज्यसभा खासदारांनी भाजपमध्ये प्रवेश करण्याचा निर्णय घेतला आहे. खासदार राघव चड्डा यांनी पत्रकार परिषदेत ही माहिती दिली आहे. गेल्या अनेक दिवसांपासून आप हायकमांड आणि राघव चड्ढा यांच्यात मतभेद सुरू होते. आज अखेर चड्डा यांनी आप सोडण्याचा निर्णय घेतला. राघव चड्ढा यांनी आम आदमी पक्षात प्रवेश करून राजकीय कारकीर्दीची सुरूवात केली होती. राजकारणात येण्यापूर्वी राघव चड्डा काय करत होते, ते सविस्तर जाणून घेऊयात.
२०१३ मध्ये अरविंद केजरीवाल यांच्याशी भेट
अण्णा हजारे २०१३ मध्ये भ्रष्टाचाराविरोधात आंदोलन करत होते. त्यावेळी रामलीला मैदानावर अरविंद केजरीवालही अण्णांसोबत होते. त्यावेळी राघव चड्डा हे खूप तरूण होते. राघव चड्डा नुकतेच चार्टर्ड अकाउंटंट (CA) बनले होते आणि लंडन स्कूल ऑफ इकॉनॉमिक्स मधून शिक्षण पूर्ण करून भारतात परतले होते. त्याच दरम्यान त्यांची भेट अरविंद केजरीवाल यांच्याशी झाली आणि त्यानंतर त्यांचा राजकीय प्रवास सुरू झाला.
22 व्या वर्षीच…
राजकारणात येण्यापूर्वीही राघव चड्ढा यांच्या नावावर मोठी उपलब्धी होती. ते अवघ्या २२ व्या वर्षी चार्टर्ड अकाउंटंट बनले होते. इतक्या कमी वयात ते देशातील हाय टॅक्स पेयर बनले होते. राघव चड्ढा यांनी दिल्ली विद्यापीठातून पदवी घेतलेली आहे. त्यानंतर त्यांनी व्यावसायिक चार्टर्ड अकाउंटंट बनण्याचा निर्णय घेतला आणि इन्स्टिट्यूट ऑफ चार्टर्ड अकाउंटंट्स ऑफ इंडिया (ICAI) मधून शिक्षण घेतले. यानंतर त्यांनी मल्टिनॅशनल ऑडिट आणि कन्सल्टिंग कंपनी डेलॉइट आणि थॉर्नटन यांच्यासाठीही काम केले.
आपचे खजीनदार
राजकारणात प्रवेश केल्यानंतर त्यांना सर्वप्रथम दिल्ली जनलोकपाल विधेयकाचा मसुदा तयार करणाऱ्या राहुल मेहरा यांना मदत करण्याची जबाबदारी देण्यात आली होती. ही जबाबदारी त्यांना स्वतः अरविंद केजरीवाल यांनी दिली होती. आम आदमी पक्षाच्या वेबसाइटवरील माहितीनुसार, २०१३ मध्ये ते पक्षाच्या जाहीरनामा तयार करणाऱ्या टीमचे सदस्य होते. त्यानंतर काही काळासाठी त्यांना पक्षाचा खजीनदार देखील बनवण्यात आले होते.
अनेक मुद्यांवर उठवला आवाज
राघव चड्डा हे स्वयंसेवक म्हणून अरविंद केजरीवाल यांच्या पक्षात सामील झाले होते, मात्र कालांतराने ते अरविंद केजरीवाल यांचे विश्वासू सहकारी बनले. त्यानंतर ते आपचे युवा प्रवक्ते बनले आणि कालांतराने माध्यमांमध्ये पक्षाचा प्रमुख चेहरा बनले. पक्षाकडून त्यांना राज्यसभेवर पाठवण्यात आले. त्यांनी अनेक मुद्द्यांवर आवाज उठवला होता. आता त्यांनी केजरीवाल यांची साथ सोडत भाजपचा झेंडा हाती घेण्याचा निर्णय घेतला आहे.
