नागपूर : महाराष्ट्रातील आगामी विधान परिषद निवडणुकांचे बिगुल वाजले असून, नागपूर विभाग पदवीधर मतदारसंघाची निवडणूक कमालीची चुरशीची ठरणार आहे. उमेदवारी अर्ज दाखल करण्याच्या अंतिम टप्प्यात (काल ५ ऑक्टोबर रोजी) प्रमुख राजकीय पक्षांच्या तसेच अपक्ष व इतर उमेदवारांनी जोरदार शक्तीप्रदर्शन करत आपले अर्ज दाखल केले आहेत. या निवडणुकीमुळे विदर्भाच्या राजकीय वर्तुळात प्रचंड हालचाली पाहायला मिळत आहे.
प्रमुख पक्ष आणि त्यांचे अधिकृत उमेदवार
या निवडणुकीसाठी भारतीय जनता पक्षाने (BJP) नागपूर पदवीधर मतदारसंघातून सुधाकर कोहळे यांच्या नावावर अधिकृत शिक्कामोर्तब करत त्यांना उमेदवारी जाहीर केली आहे. पक्षाचे निष्ठावान कार्यकर्ते आणि माजी आमदार असलेल्या कोहळे यांनी काल वाजतगाजत, जोरदार शक्तिप्रदर्शन करत आपला उमेदवारी अर्ज दाखल केला. त्यांच्यासोबत भाजपचे अनेक वरिष्ठ नेते व पदाधिकारी उपस्थित होते.
दुसरीकडे, महाविकास आघाडीकडून काँग्रेसने आपले विद्यमान आमदार अभिजित वंजारी यांना पुन्हा एकदा रिंगणात उतरवले आहे. अभिजित वंजारी यांनीही महाविकास आघाडीच्या प्रमुख नेत्यांच्या उपस्थितीत आपला उमेदवारी अर्ज दाखल केला असून, विजयाची पुनरावृत्ती करण्यासाठी कंबर कसली आहे.
इतर राजकीय आणि लक्षवेधी अर्ज
केवळ पक्षीय राजकारणच नव्हे, तर या निवडणुकीत इतर उमेदवारांच्या एन्ट्रीमुळे लढत तिरंगी किंवा बहुकोनी होण्याची शक्यता निर्माण झाली आहे. कालच्या अर्जांच्या दिवशी विविध क्षेत्रातील चेहऱ्यांनी आपले अर्ज दाखल केल्याने नागपूर पदवीधर मतदारसंघाची निवडणूक अधिकच रंजक बनली आहे. यामध्ये सोशल मीडिया गाजवणारे आणि विविध सामाजिक विषयांवर आक्रमक भूमिका मांडणारे नितेश कराळे (कराळे मास्तर) यांनीदेखील संविधानाचे स्मरण करत नागपुरात आपला उमेदवारी अर्ज दाखल केल्याने तरुणाईमध्ये मोठी चर्चा रंगली आहे. युवा ग्रॅज्युएट फोरम चे सुमेध गडपाले यांनी सुद्धा उमेदवारी अर्ज दाखल केला आहे. मागील निवडणुकीत युवा ग्रॅज्युएट फोरम च्या उमेदवाराने जोरदार लढत देऊन रंगत तिहेरी केली होती. तसेच काही अपक्ष आणि इतर इच्छुकांनीही आपले अर्ज सादर केले आहेत.
निवडणुकीचा सविस्तर निवडणूक कार्यक्रम :
उमेदवारी अर्ज भरण्याची अंतिम तारीख : ६ ऑक्टोबर २०२६ (आज)
अर्जांची छाननी (Scrutiny) : ७ ऑक्टोबर २०२६
अर्ज मागे घेण्याची अंतिम मुदत : ९ ऑक्टोबर २०२६
प्रत्यक्ष मतदान : २३ ऑक्टोबर २०२६ (सकाळी ८ ते दुपारी ४ वाजेपर्यंत)
मतमोजणी व निकाल : २७ ऑक्टोबर २०२६
रणधुमाळीला वेग; पदवीधरांच्या मतांवर लक्ष
आज उमेदवारी अर्ज भरण्याची मुदत संपत असल्याने आज दिवसभरात आणखी काही अर्ज दाखल होण्याची शक्यता आहे. मात्र, उद्या (७ ऑक्टोबर) अर्जांची छाननी झाल्यानंतर चित्र पूर्णपणे स्पष्ट होईल. या निवडणुकीत भाजपचे सुधाकर कोहळे आणि काँग्रेसचे अभिजित वंजारी यांच्यात थेट आणि अतिशय अटीतटीची लढत पाहायला मिळण्याची दाट शक्यता असली तरी नितेश कराळे व सुमेध गडपाले यांच्या उमेदवारीने लढत आणखी जोरदार रंगून चौहेरी होण्याची शक्यता आहे. पदवीधर मतदार नेमकी कोणाच्या पारड्यात आपले मत टाकतात आणि विजयाची गुलाल कोण उधळतो, याकडे संपूर्ण विदर्भाचे लक्ष लागून आहे.
Author: विवेक गंगाधरराव राऊत
लेखक सा. रयत रक्षक व रयत रक्षक न्यूज, महाराष्ट्र. चे मुख्य संपादक असून स्वतः प्रकाशक व मालक आहेत. त्यांना मागील 20 वर्षांपासून सामाजिक व राजकीय क्षेत्राचा प्रदीर्घ अनुभव व पत्रकारिता क्षेत्रातील मागील 9 वर्षाचा अनुभव आहे. आपल्या लेखणीतून ते नेहमी रयतेचे हित जोपसण्याचे कार्य करतात.
