अमरावती – भारताचे महान विचारवंत, संविधान निर्माता आणि सामाजिक क्रांतीचे अग्रदूत भारतरत्न डॉ. भीमराव रामजी आंबेडकर यांच्या जयंतीनिमित्त नवजागरण मनीषी व क्रांतिकारी स्मरण समितीच्या वतीने महावीर नगर येथे माल्यार्पण व पुष्पार्पण कार्यक्रम श्रद्धा व सन्मानाने संपन्न झाला.
कार्यक्रमाची सुरुवात “अब तो मजहब कोई ऐसा भी चलाया जाए, जिसमें इंसान को इंसान बनाया जाए” या क्रांतिकारी गीताने झाली. या गीतातून उपस्थितांमध्ये सामाजिक समता व मानवतेचा संदेश देण्यात आला. त्यानंतर उपस्थित नागरिकांनी डॉ. आंबेडकर यांच्या प्रतिमेस पुष्प अर्पण करून त्यांना अभिवादन केले.
कार्यक्रमाचे अध्यक्षस्थान समितीचे सचिव साथी सतीश ढोरे यांनी भूषविले, तर संचालन समितीचे अध्यक्ष गणेश मुंधरे यांनी केले. प्रमुख वक्ते म्हणून आकाश माहोरे, रुपेश वानखडे, विक्रांत सातारकर, अनिल बंग, कु. माही वानखडे आणि कु. लावण्या कोल्हापूरे यांनी डॉ. आंबेडकर यांच्या जीवनसंघर्ष, त्याग आणि सामाजिक न्यायासाठी केलेल्या कार्यावर प्रकाश टाकला.
वक्त्यांनी आपल्या मनोगतात सांगितले की, डॉ. आंबेडकर हे नायक पूजेचे विरोधक होते. त्यांचे जीवन अत्यंत साधे व तत्त्वनिष्ठ होते. त्यांनी कधीही वैयक्तिक संपत्ती किंवा स्वार्थासाठी कार्य केले नाही, तर शोषित, वंचित व दुर्बल घटकांच्या उन्नतीसाठी आपले संपूर्ण जीवन अर्पण केले. अशा महान व्यक्तिमत्त्वाला केवळ पूजेत मर्यादित ठेवणे हे त्यांच्या विचारांशी अन्याय ठरेल. त्यांचा खरा सन्मान म्हणजे त्यांच्या विचारांचे आचरण करून समाजात समता, न्याय व बंधुता प्रस्थापित करणे होय.
समितीच्या वतीने आवाहन करण्यात आले की, संत, महापुरुष व क्रांतिकारक यांना जात, धर्म किंवा कोणत्याही एका समुदायात विभागण्याच्या प्रवृत्तीला विरोध करावा. ते संपूर्ण मानवजातीचे आहेत. समाजात वैज्ञानिक दृष्टिकोनाचा प्रसार, अंधश्रद्धा व कुरीतींविरुद्ध लढा आणि आधुनिक शिक्षणाचा प्रसार ही आजची गरज असल्याचे नमूद करण्यात आले. तसेच वाढती महागाई, बेरोजगारी, खासगीकरण व नवीन शिक्षण धोरण (NEP) यांच्या विरोधात व्यापक जनआंदोलन उभारण्याचे आवाहन करण्यात आले.
कार्यक्रमात क्रांतिकारी गीतांचे सादरीकरण प्रियांका मुंधरे, रुपाली खोडके, नीलू दास व दीपाली ढेवले यांनी केले. दुसऱ्या गीताची प्रस्तुती आंशिक चौव्हन व समीक्षा तायडे यांनी केली. कार्यक्रमाच्या यशस्वीतेसाठी किशोर पेंढारकर, कांडलकर काका, श्रीयंका वानखडे, अंजली जावरकर व दिनेश रेवाडे यांनी विशेष परिश्रम घेतले।
