मनोरंजन विश्व : अभिनेता चिन्मय मांडलेकर आणि त्याची पत्नी नेहा यांना मुलाच्या नावावरून प्रचंड टीकेला सामोरं जावं लागलं होतं. या ट्रोलिंगवर नेहाने नुकत्याच दिलेल्या एका मुलाखतीत मनमोकळी प्रतिक्रिया दिली आहे.
अभिनेता चिन्मय मांडलेकर आणि त्याची पत्नी नेहा यांना त्यांच्या मुलाच्या नावावरून प्रचंड ट्रोलिंगचा सामना करावा लागला होता. पडद्यावर छत्रपती शिवाजी महाराज साकारतात पण खऱ्या आयुष्यात मात्र मुलाचं नाव जहांगीर ठेवलंय, असं म्हणत नेटकऱ्यांनी टीका केली होती. या टीकेवर आणि ट्रोलिंगवर आता चिन्मयची पत्नी नेहाने प्रतिक्रिया दिली आहे. नुकत्याच दिलेल्या एका मुलाखतीत ती याविषयी मोकळेपणे व्यक्त झाली. मुलाचं नाव जहांगीर ठेवून मोठा गुन्हा केला असेल तर आतापर्यंत मला अटक झाली असती, असं तिने म्हटलंय.
‘अनुरुप विवाह संस्था’ला दिलेल्या मुलाखतीत नेहा जोशी म्हणाली, “ज्या आईने नऊ महिने पोटात मूल वाढवलं, त्या मुलाच्या जन्मासाठी यातना सोसल्या, मोठ्या दिव्यातून गेली. त्या मुलाचं नाव मी काय ठेवलं, हे मला कोणी विचारूच कसं शकतं? पब्लिक फिगर असल्याने चाहत्यांच्या कौतुकासोबतच त्यांच्या टीकेलाही सामोरं जाण्याची तयारी ठेवली पाहिजे, हे मला कळतं. पण हे काही माझं काम नाही, ते माझं वैयक्तिक आयुष्य आहे. ट्रोलिंगच्या वेळी मला खरंच खूप त्रास झाला होता. मला माझ्या मुलाचं नाव दगडू ठेवायचं असेल तर मी ते ठेवणार. मला जे नाव आवडलं ते मी माझ्या मुलाचं ठेवलं. आता त्या नावाचा अर्थ जगज्जेता आहे तर मग तुम्ही विश्वजीत किंवा पृथ्वीराज का ठेवलं नाही, असं काही लोक म्हणतात. तर नाही.. माझी जशी इच्छा असेल तसं मी करेन.”
“माझ्या मुलाचं नाव जहांगीर ठेवून जर मी इतका मोठा गुन्हा केला असेल तर भारत सरकारने आतापर्यंत मला अटक केली असती. तसं काही झालेलं नाही. माझ्या संविधानाने दिलेला हक्क मी बजावत आहे. जे कोणी ट्रोल करत आहे, त्यातल्या एकाने तरी समोर यावं. त्यांना इतिहासाबद्दल बोलायचं आहे ना? ठीक आहे, आपण इतिहासाबद्दल बोलू. मग मी नाव कसं चुकीचं किंवा कसं बरोबर ठेवलं, तुमचं कसं बरोबर किंवा कसं चुकीचं ते आपण ठरवू. खरं सांगायचं झालं तर मला आता त्याने काहीच फरक पडत नाही”, अशी रोखठोक प्रतिक्रिया नेहाने दिली.
मुलाच्या नावावरून होणाऱ्या ट्रोलिंगचा विचार करून चिन्मयने भविष्यात पडद्यावर छत्रपती शिवाजी महाराजांची भूमिका साकारणार नसल्याचं जाहीर केलं होतं. “जर पडद्यावर मी छत्रपती शिवाजी महाराजांची भूमिका साकारल्याने माझ्या कुटुंबीयांना, मुलाला ट्रोलिंगला सामोरं जावं लागत असेल तर मी यापुढे ही भूमिका साकारणार नाही,” असं त्याने म्हटलं होतं.
