मुंबई – गेल्या काही काळापासून शिवसेनेच्या ऑपरेशन टायगरबाबत पुन्हा चर्चा सुरू झाली आहे. अशातच आज ठाकरे गटाच्या एका खासदाराने उपमुख्यमंत्री एकनाथ शिंदे यांच्यासोबत एकाच गाडीतून प्रवास केल्याचे समोर आले आहे.
गेल्या काही काळापासून राज्याच्या राजकारणात मोठ्या प्रमाणात पक्षांतर झाल्याचे पहायला मिळाले आहे. खासकरून लोकसभा, विधानसभा आणि स्थानिक स्वराज्य संस्थांच्या निवडणुकीत बऱ्याच नेत्यांनी महायुतीतील पक्षांची वाट धरली होती. आता गेल्या काही काळापासून शिवसेनेच्या ऑपरेशन टायगरबाबत पुन्हा चर्चा सुरू झाली आहे. अशातच आज ठाकरे गटाच्या एका खासदाराने उपमुख्यमंत्री एकनाथ शिंदे यांच्यासोबत एकाच गाडीतून प्रवास केल्याचे समोर आले आहे. यामुळे राजकारणात खळबळ उडाली आहे. याबाबत सविस्तर माहिती जाणून घेऊयात.
एकनाथ शिंदे आणि संजय दिना पाटील यांचा एकाच गाडीतून प्रवास
उपमुख्यमंत्री एकनाथ शिंदे आणि शिवसेना उद्धव बाळासाहेब ठाकरे पक्षाचे खासदार संजय दिना पाटील यांनी एकाच गाडीतून प्रवास केला. काही दिवसांपूर्वी संजय दिना पाटील यांच्या पत्नीचा अपघात झाला होता, त्यांच्यावर मुंबईतील फोर्टीस रुग्णालयात उपचार सुरू आहेत. त्यांच्या पत्नीच्या तब्येतीची विचारपूस करण्यासाठी उपमुख्यमंत्री एकनाथ शिंदे गेले होते. एकनाथ शिंदे निघाले तेव्हा त्यांच्या गाडीत संजय दिना पाटील बसले होते. त्यामुळे राजकीय चर्चांना उधाण आलं आहे.
ऑपरेशन टायगरची पुन्हा चर्चा
एकनाथ शिंदे आणि संजय दिना पाटील हे जुने सहकारी आहेत, एक जुने सहकारी मित्र म्हणून रुग्णालयात तब्येतीची विचारपूस करायला जाण्यापर्यंत ठीक होतं. मात्र संजय दिना पाटील यांनी एकनाथ शिंदे यांच्यासोबत त्यांच्या गाडीतून प्रवास केल्यामुळे ऑपरेशन टायगरच्या चर्चेला पुन्हा उधाण आलं आहे. कारण काही दिवसांपूर्वी ठाकरे गटातील काही खासदार शिंदेंच्या संपर्कात असल्याचे समोर आले होते. त्यामुळे आता पुन्हा ही चर्चा सुरू झाली आहे.
एकनाथ शिंदेंनी जिंकले मन
उपमुख्यमंत्री एकनाथ शिंदे सह्याद्री अतिथीगृहावरून बाहेर पडत असताना एका दिव्यांग महिलेने आपल्या मुलाच्या कामाच्या संदर्भात एकनाथ शिंदे यांच्याकडे मदत मागितली. त्यावेळी उपमुख्यमंत्री एकनाथ शिंदे यांनी आपली गाडी थांबवून त्या महिलेशी संवाद साधला. या महिलेचा प्रश्न समजावून घेऊन ताबडतोब कंपनीला फोन लावून त्या महिलेच्या मुलाला काम देण्याबाबत सूचना केल्या. यानंतर त्या महिलेने एकनाथ शिंदे यांचे आभार देखील मानले.
