नवी दिल्ली : रिझर्व्ह बँक ऑफ इंडियाकडून डिसेंबर महिन्यात रेपो रेटमध्ये २५ बेसिस पॉईंटची कपात केली जाण्याची शक्यता आहे. रॉयटर्सनं केलेल्या सर्वेक्षणात बहुतांश अर्थतज्ज्ञांनी रेपो रेटमध्ये कपातीचा अंदाज वर्तवला आहे. येत्या ५ डिसेंबरला रेपो रेट ५.२५ टक्के होईल, असा अंदाज अर्थतज्ज्ञांनी वर्तवला असून हाच रेपो रेट २०२६ मध्ये कायम राहू शकतो, असा अंदाज वर्तवण्यात आला आहे.
अन्नधान्याच्या दरातील कपात आणि जीएसटीचे दर कमी केल्यानं भारतातील ग्राहक महागाईचा निर्देशांक ऑक्टोबरमध्ये ०.२५ टक्के नोंदवण्यात आला आहे. दुसरीकडे डॉलरच्या तुलनेत रुपयाचं मूल्य ८९.४९ रुपयांवर पोहोचलं आहे.
आरबीआय रेपो रेट घटवणार?
आरबीआयचे गव्हर्नर संजय म्हलोत्रा यांनी या आठवड्यात अलीकडील आर्थिक डेटा पाहता व्याज दरात कपातीची संधी अजूनही आहे, असे संकेत दिले आहेत. आरबीआयनं ऑगस्टपासून रेपो रेट स्थिर ठेवले आहेत. संजय म्हलोत्रा यांनी पहिल्या सहा महिन्यात रेपो रेटमध्ये १०० बेसिस पॉईंटची कपात केली होती.
आरबीआयच्या पतधोरण विषयक समितीची बैठक ३ डिसेंबर ते ५ डिसेंबरपर्यंत सुरु राहणार आहे. रॉयटर्सच्या सर्व्हेनुसार ८० पैकी ६२ टक्के अर्थशास्त्रज्ञांनी रेपो रेटमध्ये २५ बेसिस पॉईंटची कपात आरबीआयकडून केली जाईल असा अंदाज वर्तवला आहे. त्याचवेळी १८ अर्थतज्ज्ञांनी रेपो रेटमध्ये कोणताही बदल होणार नाही, असा अंदाज वर्तवला आहे.
भारताची अर्थव्यवस्था जुलै ते सप्टेंबर या कालावधीत ७.३ टक्क्यांनी वाढण्याची शक्यता आहे. रॉयटर्सच्या अंदाजानुसार २०२६ मध्ये शेअर बाजार उच्चांक गाठू शकतो. त्यामुळं रेपो रेटमधील कपातीचा अंदाज व्यक्त केला जातोय.
अमेरिकेचे अध्यक्ष डोनाल्ड ट्रम्प यांनी भारतीय वस्तूंच्या आयातीवर ५० टक्के शुल्क लादलं आहे. दुसरीकडे विदेशी गुंतवणूकदारांनी भारतीय शेअर बाजारातून मोठ्या प्रमाणावर पैसे काढून घेतले आहेत. भारत रशियाकडून तेल खरेदी करत असल्यानं डोनाल्ड ट्रम्प यांनी भारतावर दुप्पट टॅरिफ लादलं आहे. ट्रम्प यांनी अगोदर भारतावर २५ टक्के टॅरिफ लादलं होतं. त्यानंतर रशियाकडून तेल खरेदी सुरु ठेवून यूक्रेन विरुद्धच्या युद्धासाठी रशियाच्या मदतीचा ठपका ठेवत ट्रम्प यांनी भारतावर अतिरिक्त २५ असं मिळून ५० टक्के टॅरिफ लादलं होतं. त्याचा फटका भारतीय निर्यातदारांना बसला आहे. त्याचवेळी भारतात जीएसटीच्या स्लॅबच्या दरात कपात केल्याचा थोडासा सकारात्मक परिणाम दिसत आहे.
अमेरिका आणि भारत यांच्यातील व्यापार करार कधी होणार याबाबत स्पष्टता आलेली नाही. कॅनरा बँकेचे मुख्य अर्थशास्त्रज्ञ माधवनकुट्टी जी यांनी पुढील अर्ध्या वर्षापर्यंत रेपो रेट ५.२५ टक्के राहण्याचा अंदाज वर्तवला आहे.
