कल्याण : कल्याण-डोंबिवली महापालिकेत शिवसेना उबाठा पक्षाला अनपेक्षित यश मिळाले, तरी ते टिकवणे त्यांना जमलेले दिसत नाही. सत्तास्थापनेसाठी गट स्थापन करण्यापूर्वीच त्यांचे चार नगरसेवक ‘नॉट रिचेबल’ झाल्याचे दिसत आहे. गटनेता निवडीसाठी आयोजित बैठकीला उपस्थित राहण्याचे पत्र स्वीकारण्यासाठी हे चार नगरसेवक उपलब्ध झाले नसल्याचे पक्षाच्या स्थानिक नेत्यांनी सांगितले. या नगरसेवकांच्या दरवाजावर जिल्हाप्रमुखांच्या सहीचे पत्र चिकटवण्यात आल्याचे शहरप्रमुख शरद पाटील यांनी सांगितले. दरम्यान, उर्वरित नगरसेवकांसह स्थानिक पदाधिकारी ‘मातोश्री’ वर रवाना झाले असून तिथे कल्याण डोंबिवलीतील ठाकरे गटाच्या गटनेत्याच्या नावाची घोषणा केली जाणार आहे.
शिवसेनेच्या ठाकरे गटातून निवडून आलेले मधुर म्हात्रे आणि ॲड. कीर्ती ढोणे हे दोन नगरसेवक शिवसेना शिंदे गटाचे कार्यकर्ते असून त्या पक्षातून तिकीट न मिळाल्याने त्यांनी उबाठाच्या माध्यमातून लढत देत विजय मिळवला. त्यानंतरही, त्यांनी आपल्या वरिष्ठांशी प्रामाणिक राहत निवडून येताच शिवसेना उबाठा पक्षप्रमुख उद्धव ठाकरे यांच्या भेटीआधीच खासदार डॉ. श्रीकांत शिंदे यांचे आशीर्वाद घेतले आणि नंतर ते ‘नॉट रिचेबल’ झाले.
यानंतर काही वेळातच प्रभाग क्रमांक ४ मधून निवडून आलेले राहुल कोट आणि प्रभाग क्रमांक ६ मधून निवडून आलेल्या स्वप्नाली केणे हे दोन नगरसेवक ‘नॉट रिचेबल’ झाले आहेत. हे दोन्ही मनसेचे कार्यकर्ते असून ते मनसेच्या नेत्यांना भेटण्यासाठी पोहोचले होते. त्यानंतर त्यांचा संपर्क होत नसल्याचे त्यांच्या कुटुंबीयाचे म्हणणे आहे.
यामुळेच या चारही नगरसेवकांच्या कुटुंबीयांकडे ठाकरे गटाच्या नेत्यांनी पक्षाच्या बैठकीला उपस्थित राहण्याचा व्हिप वजा आदेशपत्र सोपविले आहे. आपल्याला व्हिप मिळालाच नसल्याचा दावा या नगरसेवकांकडून केला जाऊ शकतो. म्हणून या पत्रांची प्रत त्यांच्या दरवाजावरही चिकटवण्यात आल्याचे शहरप्रमुख शरद पाटील यांनी सांगितले.
नगरसेवक निश्चित झाल्यानंतर महापालिका प्रशासनाकडून या नगरसेवकांना गट स्थापन करून गटनेता निश्चित करण्याबाबत पत्र धाडण्यात आली आहेत. गटनेता निश्चित झाल्यानंतर, या गटांची नोंदणी कोकण विभागीय आयुक्तांकडे केली जाईल. या गटातील जो सर्वांत मोठा गट असेल, त्याला महापौर करण्याबाबत महापालिका सचिवांकडून पत्र धाडले जाणार आहे, असे महापालिका प्रशासनाकडून स्पष्ट करण्यात आले आहे.
