मुंबई : पश्चिम रेल्वेने ३० दिवसांचा ब्लॉक जाहीर केला असून, हा ब्लॉक २० डिसेंबरपासून १८ जानेवारीपर्यंत असणार आहे. यामध्ये कोणत्या गाड्या उशिराने धावणार आहेत, याची माहिती कालच देण्यात आली होती. मात्र, आज २१ डिसेंबरपासून ८० लोकल गाड्या रद्द करण्यात येणार असल्याने प्रवाशांचा मोठा खोळंबा होण्याची शक्यता आहे.
पश्चिम रेल्वेचे मुख्य जनसंपर्क अधिकारी विनीत अभिषेक यांनी सांगितले की, या कामामध्ये कांदिवली आणि बोरिवली दरम्यान ट्रॅक सरकवणे तसेच अनेक क्रॉसओव्हर बसवणे व काढणे यांचा समावेश आहे. यासोबतच अभियांत्रिकी, सिग्नलिंग आणि ओव्हरहेड उपकरणांची मोठी कामे केली जाणार आहेत. त्यामुळे रेल्वे वाहतुकीवर परिणाम होणार असून काही उपनगरीय, प्रवासी तसेच मेल/एक्स्प्रेस गाड्यांवरही त्याचा परिणाम होईल.
२०/२१ डिसेंबर ते २५/२६ डिसेंबर या कालावधीत रात्रीचा ब्लॉक जाहीर करण्यात आला आहे. हा ब्लॉक दररोज रात्री ११ वाजल्यापासून पहाटे ४.३० वाजेपर्यंत असणार आहे. पाचवी मार्गिका बंद करण्यात आल्यामुळे काही उपनगरीय लोकल सेवा रद्द करण्यात येणार आहेत.
या ब्लॉकदरम्यान पाचवी मार्गिका प्रवासी गाड्यांसाठी पूर्णपणे बंद राहणार आहे. पाचव्या मार्गिकेवरील सर्व मेल, एक्स्प्रेस आणि उपनगरीय लोकल गाड्या अंधेरी/गोरेगाव आणि बोरिवलीच्या फास्ट मार्गिकेवरून धावतील. त्यामुळे अनेक लोकल उशिराने धावणार असून काही लोकल रद्दही करण्यात आल्या आहेत. दरम्यान, ३१ डिसेंबर रोजी नववर्षानिमित्त प्रवाशांची गर्दी वाढणार असल्याने प्रवाशांचा खोळंबा होऊ नये यासाठी योग्य उपाययोजना करण्यात येतील, अशी माहितीही रेल्वे प्रशासनाकडून देण्यात आली आहे.
रद्द केलेल्या गाड्यांची यादी
२० आणि २१ डिसंबर – BVI ९०८०३ (१९.१९ ला सुटणारी फास्ट लोकल)MDD ९०७६८ (१८.४४ ला सुटणारी फास्ट लोकल), BVI ९०९७९ ( २२.२४ ला सुटणारी फास्ट लोकल), BVI ९०८६० (२०.१६ ला सुटणारी फास्ट लोकल), BVI ९०९८९ (२०.३३ ला सुटणारी फास्ट लोकल) BVI ९०९९६ (२३.२५ ला सुटणारी फास्ट लोकल), VR ९२२०० (२१.४४ ला सुटणारी धीमी लोकल).
तसेच, २१ डिसेंबर ते २५ डिसेंबर २०२५ या कालावधीत दररोज 94 लोकल गाड्या रद्द करण्यात येणार असून त्यामध्ये ४७ अप आणि ४७ डाउन सेवांचा समावेश आहे. २६ डिसेंबर २०२५ रोजी एकूण ८७ लोकल गाड्या रद्द केल्या जातील, ज्यामध्ये ४० अप आणि ४७ डाउन सेवांचा समावेश असेल. रेल्वे अधिकाऱ्यांनी प्रवाशांना प्रवासाचे नियोजन करूनच बाहेर पडावे तसेच स्थानकांवरील सूचना आणि घोषणांकडे लक्ष द्यावे, असे आवाहन केले आहे.
