व्यवसाय : इराण युद्धाला तात्पुरता ब्रेक लागल्याने सर्व जगाचा जीव भांड्यात पडला आहे. तर पेट्रोल-डिझेलच्या किंमतीत सध्या कोणतीही वाढ झाली नसली तरी गेल्या काही वर्षात गॅस सिलेंडरच्या किंमती वाढल्या आहेत. त्याचवेळी मोदी सरकारसमोर एक मोठा प्रस्ताव आला आहे. सिलेंडर स्वस्त होणार?
आघाडीवर जनतेला एक मोठा दिलासा मिळण्याची शक्यता आहे. सीटीआयने(CTI) पंतप्रधान नरेंद्र मोदी यांना पत्र लिहिले आहे. त्यानुसार गॅसवरील कर हटवण्याची मागणी लावून धरण्यात आली आहे. याविषयीचा प्रस्ताव मोदी सरकारसमोर आहे. व्यावसायिक गॅस सिलेंडरवरील १८% जीएसटी हटवण्याची वकिली करण्यात आली आहे. त्यामुळे व्यावसायिक गॅस सिलेंडरची किंमत थेट ३१७ रुपयांनी कमी होईल. तर घरगुती गॅस सिलेंडरवरील ५% कर हटवण्याची मागणी करण्यात आली आहे. त्यामुळे घरगुती गॅस सिलेंडर ४३ रुपयांनी स्वस्त होईल. केंद्र सरकारने घरगुती गॅस सिलेंडरवर ६० रुपयांची वाढ केली होती. ती मागे घेतल्यास आणि कर कपात केल्यास घरगुती गॅस सिलेंडर १०० रुपयांनी स्वस्त होण्याची शक्यता आहे.
पंतप्रधान मोदींना साकडे
चेंबर ऑफ ट्रेड अँड इंडस्ट्रीजने (CTI) पंतप्रधान नरेंद्र मोदी यांना पत्र लिहून एलपीजी आणि पीएनजी कर मुक्त करण्यासाठी साकडे घातले आहे. इराण-अमेरिका युद्धामुळे गॅस पुरवठ्यावर मोठा परिणाम झाला आहे. हा परिणाम कमी करण्यासाठी ग्राहकांवरील कराचा भार कमी करण्यासाठी हा उपाय सुचवण्यात आला आहे. यापूर्वी सु्द्धा केंद्र सरकारकडे अत्यावश्यक सेवा कर मुक्त करण्याचा आग्रह धरण्यात आला होता. मनमोहन सिंग यांच्या कार्यकाळात गॅसची किंमत ५०० रुपयांच्या आत होत्या. तर मोदी सरकारच्या कार्यकाळात सिलेंडरचे भाव हजार रुपयांच्या जवळपास आहेत.
कराचे गणित काय?
सध्या घरगुती एलपीजी सिलेंडरवर ५ टक्के जीएसटी लागू आहे. तर व्यावसायिक सिलेंडरवर हा दर १८ टक्के इतका आहे. तर पाईपच्या माध्यमातून स्वयंपाक घरात पोहचणारा पीएनजी (PNG) सध्या जीएसटी परिघाबाहेर आहे. तर राज्य सरकार पीएनजीवर व्हॅट (VAT) आकारते. त्याचा थेट परिणाम सर्वसामान्यांच्या खिशावर होतो.
घरगुती सिलेंडर स्वस्त होणार
जर सरकारने घरगुती गॅस सिलेंडरवरील ५ टक्के जीएसटी हटवला तर ग्राहकांच्या खिशावरील ताण झटक्यात कमी होईल. समजा जर सध्या घरगुती गॅस सिलेंडरची किंमत ९१३ रुपये असेल आणि त्यावरील ५ टक्के जीएसटी माफ झाला. तर जवळपास ४३ रुपये कमी होतील. म्हणजे सिलेंडर ८६९.५२ रुपयांना मिळेल. जर ६० रुपये वाढलेली किंमतही कमी झाली तर सिलेंडरचा दर थेट ८०९.५२ रुपयांवर पोहचेल. ग्राहकांना मोठा दिलासा मिळेल.
