महोबा – लोकसभेत मतदार पुनर्रचना विधेयकावरून पराभव झाल्यानंतर भाजप नेते महिला सन्मान मोर्चे काढत आहेत. मात्र भाजप नेते कशाप्रकारे महिलांचा सन्मान करतात याचा प्रत्यय आणणारा एक प्रकार उत्तर प्रदेशातील महोबा येथून समोर आला आहे. येथील जिल्हाध्यक्षाने एक महिला नेत्रीला थेट ‘माझ्यासोबत झोप, मी तुला जिल्हा उपाध्यक्ष बनवीन’, असा प्रस्ताव दिल्याचा आरोप भाजप महिला नेत्या दिपाली तिवारी यांनी केला आहे.
पक्षाच्या माजी जिल्हामंत्री दिपाली तिवारी यांनी महोबा भाजप जिल्हाध्यक्ष मोहनलाल कुशवाहा यांच्यावर गंभीर आरोप केले आहेत. जिल्हा उपाध्यक्ष पदाच्या बदल्यात जिल्हाध्यक्षांनी त्यांच्यासोबत लैंगिक संबंध ठेवण्याची अनैतिक मागणी केली. पक्षाच्या दोन अधिकाऱ्यांनीही जिल्हाध्यक्षांच्या मागण्या मान्य करण्यासाठी त्यांच्यावर दबाव टाकला. जर तिने ही बाब कुणाला सांगितली तर तिच्या पतीला खोट्या बलात्कार प्रकरणात गोवून तुरुंगात पाठवण्याची धमकी त्यांनी दिली.
पीडितेने जाहीरपणे दावा केला आहे की जिल्हाध्यक्ष मोहनलाल कुशवाहा यांनी तिला उपाध्यक्षपदी बढती देण्याच्या बदल्यात तिच्याकडून लैंगिक संबंधांची मागणी केली होती. तिने पुढे असा आरोप केला आहे की जेव्हा तिने ही मागणी नाकारली तेव्हा तिला आगामी निवडणुकीसाठी तिकीट देण्याचे आमिष दाखवण्यात आले. पीडितेचा दावा आहे की प्रस्ताव नाकरल्यानंतर जिल्हाध्यक्षांनी आपल्या पदाचा गैरवापर केला आणि तिच्या व तिच्या कुटुंबाविरुद्ध खोटे गुन्हे दाखल करण्याची धमकी दिली.
दीपाली तिवारी म्हणाल्या तेव्हाच मला आवाज उठवणे भाग पडले. माझ्या पतीनेही मला माझी बाजू मांडण्यासाठी आणि न घाबरण्यासाठी प्रोत्साहन दिले. त्या म्हणाल्या की काही काळापूर्वी संघटनेत तयार करण्यात आलेल्या एका गटात आपला समावेश करावा आणि जिल्हा सरचिटणीस किंवा जिल्हा उपाध्यक्ष यांसारखे पद द्यावे, अशी त्यांनी वारंवार विनंती केली. जिल्हाध्यक्ष मोहनलाल यांनी बोलावल्यानंतर त्या त्यांच्याकडे गेल्या.
मोहनलाल दीपालीला म्हणाले जर मी तुला जिल्हा उपाध्यक्ष बनवले, तर तुला माझ्यासोबत सर्वत्र, लखनौ आणि दिल्लीला यावे लागेल. कोणालाही काही संशय येणार नाही. फक्त एकदा माझ्यासोबत झोप. जर तू माझे म्हणणे मान्य केलेस, तर मी तुला जिल्हा पंचायतीचे तिकीटही मिळवून देईन. जर तिने त्यांच्या मागण्या मान्य केल्या तर तिला एक पद दिले जाईल. हे ऐकून तिला धक्का बसला. हे अत्यंत अपमानकारक होते, फक्त एकदा तडजोड करा, असे तिला सांगण्यात आले.
यावर तिने उत्तर दिले की घरी त्यांनाही बहिणी आणि मुली आहेत; अशा गोष्टी कशा बोलल्या जाऊ शकतात? यानंतर त्या निघू लागल्या. असा आरोप आहे की त्या निघत असताना त्यांना असेही सांगण्यात आले की जर त्या सहमत झाल्या तर त्यांना जिल्हा पंचायतीचे तिकीट दिले जाऊ शकते. मोहनलाल यांचे जवळचे अधिकारी पंकज तिवारी यांनी तिला सांगितले की जर त्या जिल्हाध्यक्षांच्या मागण्या मान्य करतील तर त्यांना जिल्हा महासचिव बनवले जाऊ शकते. तिने स्पष्टपणे नकार दिला आणि पुन्हा असे वक्तव्य न करण्याची ताकीद दिली.
दीपालीने याबद्दल आपल्या पतीला सांगितले. त्यांच्या सल्ल्यानुसार, तिने सोमवारी पोलीस अधीक्षक शशांक सिंग यांच्याकडे तक्रार दाखल केली. पोलीस अधीक्षकांच्या मते या प्रकरणाचा तपास सुरू आहे. दुसरीकडे, जिल्हाध्यक्ष मोहनलाल कुशवाहा यांनी हे सर्व आरोप पूर्णपणे फेटाळून लावले असून हा एक हेतुपुरस्सर रचलेला कट असल्याचे म्हटले आहे.
