मुंबई : सोशल मीडिया इन्फ्लुएन्सर ओऱ्हान अवत्रामणी उर्फ ऑरी याची एका मोठ्या अमली पदार्थ जप्तीच्या प्रकरणात मुंबई पोलिसांच्या अमली पदार्थ विरोधी पथकाने कसून चौकशी केली. ऑरी मंगळवारी दुपारी १.३० वाजताच्या सुमारास घाटकोपर येथील एएनसी कार्यालयात पोहोचला. एसी बंद, फॅन हळू करुन सात तास ऑरीची चौकशी झाल्याची माहिती आहे. ऑरीला गेल्या गुरुवारी (२० नोव्हेंबर) बोलावण्यात आले होते, परंतु त्याने अधिक वेळ मागितला होता.
काय आहे प्रकरण?
पोलिसांनी दिलेल्या माहितीनुसार, २५२ कोटी रुपयांच्या मेफेड्रोन जप्तीच्या प्रकरणात मुख्य आरोपी मोहम्मद सलीम मोहम्मद सुहेल शेख याच्या चौकशीदरम्यान ऑरीचे नाव समोर आले. हे प्रकरण सांगली येथील मेफेड्रोनच्या मोठ्या उत्पादन युनिटशी संबंधित आहे.
दाऊदच्या नातेवाईकासाठी रेव्ह पार्टी
देश-परदेशात काही चित्रपट आणि फॅशन क्षेत्रातील सेलिब्रिटी, एक राजकारणी आणि फरार गुंड दाऊद इब्राहिमच्या एका नातेवाईकासाठी रेव्ह पार्ट्या आयोजित करत असल्याचे आरोपी शेखने सांगितल्याची माहिती आहे. पोलिसांनी दिलेल्या माहितीनुसार, शेखने घेतलेल्या नावांमध्ये ऑरीचाही समावेश होता.
लॅव्हिश नावाने कुख्यात
‘लॅव्हिश’ या टोपणनावाने ओळखल्या जाणाऱ्या शेखला गेल्या महिन्यात दुबईतून हद्दपार करण्यात आले होते. पोलिसांनी यापूर्वी सांगितले होते की, शेख हा सलीम डोलाचा जवळचा सहकारी होता, जो देशभरात मेफेड्रोनचे उत्पादन आणि वितरण पाहत असे.
बुधवारी पोलिसांनी ऑरीची सहा ते सात तास चौकशी केली. पोलिसांनी एअर कंडिशनर बंद ठेवून खोलीचे तापमान मुद्दाम वाढवले होते, जेणेकरुन तो अस्वस्थ होईल, असे एका अधिकाऱ्याने सांगितले. एका वरिष्ठ अधिकाऱ्याने सांगितले की, ऑरीची ओळख दुबईत गुंड दाऊद इब्राहिमच्या नातेवाईकाशी झाली असावी, असा त्यांना संशय आहे.
नोकरीचे ठिकाण सांगितले
ऑरीच्या उत्पन्नाच्या स्रोतांबद्दल विचारले असता त्यानेपोलिसांना सांगितले की तो एका टेलिकॉम कंपनीत दरमहा ३ लाख रुपये पगारावर काम करतो. मात्र पोलिसांनी सांगितले की त्याची जीवनशैली त्याच्या उत्पन्नाच्या स्रोताशी जुळणारी नव्हती.
