चंद्रपूर : राज्यभरात सध्या नगर परिषद आणि नगर पंचायत निवडणुकांच्या प्रचाराचा धुराळा उडताना बघायला मिळत आहे. राज्यभरात उद्या विविध नगर परिषद आणि नगर पंचायतींच्या निवडणुकांसाठी मतदान पार पडणार आहे. निवडणूक प्रक्रियेत काही गोष्टींना विलंब झाल्याने प्रचारासाठी एक दिवसांचा कालावधी निवडणूक आयोगाकडून वाढवून मिळाला होता. निवडणूक आयोगाने सोमवारी रात्री दहा वाजेपर्यंत प्रचार करण्यास मूभा दिली होती. त्यामुळे आज रात्री दहा वाजता सर्वत्र प्रचाराचा तोफा थंडावणार आहे. त्यानंतर लगेच उद्या सकाळी मतदानाला सुरुवात होणार आहे. त्यामुळे आजचा दिवस हा सर्व उमेदवारांसाठी महत्त्वाचा होता. या अंतिम क्षणामध्ये काँग्रेसने चंद्रपुरात मोठी क्लृप्ती वापरली. मतदारांना आकर्षित करण्यासाठी काँग्रेसने इथे मोठी राजकीय खेळी केली.
चंद्रपूर जिल्ह्यातील मूल शहरात आज काँग्रेसची प्रचारसभा आकर्षक ठरली. कारण या प्रचारसभेत चक्क डान्सर गौतमी पाटील प्रचार करताना बघायला मिळाली. त्यामुळे या प्रचारसभेला मोठी गर्दी झालेली बघायला मिळाली. गौतमी पाटील हिचे राज्यात लाखो चाहते आहेत. त्यामुळे गौतमी पाटील प्रचार करताना दिसली तर तिच्या प्रचाराभोवती गर्दी होणं ही साहजिकच आहे. चंद्रपूरच्या मूल शहरात आज अनेक जण गौतमी पाटील हिला काँग्रेसचा प्रचार करताना पाहून आश्चर्यचकीत झाले. सेलेब्रेटींच्या माध्यमातून याआधीदेखील प्रचार झाले आहेत.
गौतमी पाटील हिने मूल शहरात काँग्रेसच्या उमेदवार एकता समर्थ यांच्या प्रचारासाठी रोड शो केला. एका उघड्या जीपमधून गौतमी पाटील हिच्यासोबत काँग्रेसच्या नगराध्यक्षपदाच्या उमेदवार आणि नगरसेवक पदाचे नगरसेवक यांनी रोड शो केला. यावेळी गौतमी पाटील हिने मतदारांना काँग्रेसला मतदान करण्याचं आवाहन केलं.
गौतमी नाकात नथणी आणि गळ्यात काँग्रेसचा गमछा परिधान करुन प्रचारात सहभागी झाली होती. मूलमधील दुर्गा माता मंदिरपासून तिचा रोड शो निघाला होता. यावेळी काँग्रेसच्या कार्यकर्त्यांकडून जोरदार शक्तीप्रदर्शन करण्यात आलं. गौतमी पाटील हिने सर्वांना हात दाखवत काँग्रेसला मतदान करण्याचं आवाहन केलं. यावेळी रोड शोमध्ये मोठी गर्दी जमा झाली होती. गौतमीने यावेळी तिच्या चाहत्यांसोबत फोटोदेखील काढले. गौतमी प्रचारात सहभागी झाल्याने रोड शो दरम्यान सर्वत्र उत्साहाचे आणि आनंदी वातावरण बघायला मिळाले.
सुधीर मुनगंटीवार यांना आव्हान
भाजपचे ज्येष्ठ नेते सुधीर मुनगंटीवार यांच्या मतदारसंघातील मूल नगर परिषदेची निवडणूक पार पडत आहे. या नगर परिषद निवडणुकीत भाजप विरुद्ध काँग्रेस अशी थेट लढत आहे. या निवडणुकीत दोन्ही बाजूने प्रचंड ताकद लावली जात आहे. तसेच सुधीर मुनगंटीवार यांना संपूर्ण राज्यात चांगली ओळख असल्याने या निवडणुकीत त्यांची प्रतिष्ठा पणाला लागली आहे. काँग्रेसकडून भाजपचा पराभव करण्यासाठी वेगवेगळ्याप्रकारे मतदारांना मतदान करण्यासाठी आवाहन केलं जात आहे. त्याचाच एक भाग म्हणून काँग्रेसने निवडणुकीच्या प्रचारात थेट गौतमी पाटील हिला उतरवलं आहे. गौतमी पाटील हिच्या रोड शोला मूल शहरात चांगला प्रतिसाद देखील मिळताना बघायला मिळालं आहे.
