पुणे : एक खतरनाक घटना घडली आहे. पुण्यात वकिलाच्या ऑफिसमध्ये त्याच्या बायकोनेच विवाहित महिला सेक्रेटरची हत्या केली आहे. पोलिसांनी या प्रकरणी तिघांना अटक केली आहे. पण या हत्येचं कारण काय?.
पुण्यात एका वकिलाच्या ऑफिसमध्ये ३२ वर्षीय महिलेची हत्या झाली आहे. पोलिसांनी वकिलाची पत्नी आणि त्यांच्या अल्पवयीन मुलीला या गुन्ह्याप्रकरणी अटक केली आहे. अफेअरच्या संशयातून ही हत्या करण्यात आली आहे. पुण्याच्या चंदननगर भागात ही घटना घडली. मृत मुलीच्या कुटुंबियांची दिशाभूल करणे आणि गुन्हा लपवण्यासाठी मदत केल्याच्या आरोपाखाली पोलिसांनी वकिलाला सुद्धा ताब्यात घेतलं आहे. पूनम दिनेश मून असं मृत महिलेचं नाव असून ती येरवडा येथे रहायला आहे. मागच्या साडेतीन वर्षांपासून ती वकिल संजय सावंत यांच्या कार्यालयात सहाय्यक आणि सेक्रेटरी म्हणून त्यांच्यासोबत काम करत होती.
१६ एप्रिलला पूनम नेहमीप्रमाणे कामावर आली. संजय सावंत यांची पत्नी स्वातीला संशय आला की, पूनम आणि संजय यांचे अनैतिक संबंध आहेत. स्वाती आणि तिच्या अल्पवयीन मुलीने पूनमचे हात-पाय बांधले व तिला बॅटने मारहाण केली. यात तिचा मृत्यू झाला. गुरुवारी रात्री ८ वाजेपर्यंत पूनम घरी आली नाही. म्हणून तिचा नवरा दिनेशने वकिल संजय सावंत यांना फोन लावला. पोलिसांननुसार, संजय सावंत यांनी त्यावेळी दिनेश यांची दिशाभूल केली. त्यांनी सांगितलं की, पूनम कदाचित तिच्या मैत्रीणीला भेटायला गेली असेल.
गुन्ह्याची उकल कशी झाली?
सावंत यांच्या जुना मुंढवा रोडला असलेल्या कार्यालयात शुक्रवारी सकाळी दिनेश आला. त्यावेळी गुन्ह्याची उकल झाली. कार्यालयाचं शटर उघडं होतं. त्याने आतामध्ये जाऊन पाहिलं, तेव्हा पूनमचा मृतदेह रक्ताच्या थारोळ्यात पडलेला होता. एका गोणीत मृतदेह भरुन ठेवण्याचा सुद्धा प्रयत्न झाला असं पोलिसांनी सांगितलं.
वकिलावर काय आरोप?
पोलिसांनी दिलेल्या माहितीनुसार वकिल संजय सावंत या मारहाणीत सहभागी नव्हते. ते सहआरोपी आहेत. त्यांच्यावर माहिती दडवण्याचा, आरोपींना मदत करण्याचा आणि मृत महिलेच्या पतीची दिशाभूल करण्याचा आरोप आहे. चंदननगर पोलीस आणि गुन्हे शाखेने सहातासात गुन्ह्याची उकल केली.
